Chawchhun chhûmtute hlawh pun

School Education minister Dr Vanlalthlana chuan, ZPM sorkar hnuah sorkar sikula chawchhun chhûmtute hlawh tihpunsak a nih thu nimin khan Assembly House a hrilh.

ZPM member Lalmuanpuia Punte zawhna chhangin Dr Vanlalthlana chuan, "PM Poshan cook hlawh hi Central-in thla khatah Rs 900 tumin, state sorkarin Rs 600-in a dolet ṭhin. A hma chuan thla khatah Rs 1,500 an hlawh ṭhin," a ti.

Education Minister sawi danin, sorkar sikula chawchhun chhûmtute an hlawh a tlem êm avangin ZPM-in sorkarna an chan hnuah Finance department-ah an dil a, anni lamin rang takin an phalsak. State sorkarin Rs 600-a a do let ṭhin (state share) chu Rs 2,100-ah tihpun a ni.

State sorkarin chawchhun chhûmtute hlawh tur a tihpun tâk avang hian sorkar sikula chawchhun chhûmtute'n thla khatah Rs 3,000 an hlawh tawh a ni.