Gas endik chungchang sawifiah

Food, Civil Supplies & Consumer Affairs department chuan eirawngbawlna gas endik chungchangah thuchhuah a siam a; endiknain a tum ber chu mipui himna a nih thu leh, LPG kaihhnawiha vanduaina a thlen palhin endikna paltlangte chauhin zang-nadawmna an dawn theih thu a tarlang.

FCSCA department chuan, LPG Manual, 2021 Section 5.3-in a phût angin oil marketing company (OMC) leh Indian Oil Corporation Limited (IOC) inkaihhruaina angin, LPG consumer-te him tlan zawk nan a khât tâwkin endikna neih ṭhin a nih thu a tarlang a, "Hetiang endikna neih hian a tum ber chu mipui himna a ni a, kan LPG dahna hmun leh hman dante a him tâwk em tihte endik a ni ṭhin. LPG kaihhnawih vanga vanduaina a lo thlen palh chângin hetianga endikna paltlangte chauh hian zangnadawmna an dawng thei," a ti.

OMC-te dan siam angin endikna atan hian service charge Rs 200 bakah GST 18% nen a vaiin Rs 236 lak a nih thu leh, hei hi OMC leh IOC te chan tur niin, state sorkarin chan tur a neih loh thu FCSCA chuan a tarlang.

Supply department chuan, eirawng-bawlna gas endikna hi April 2026 chhungin chhunzawm leh tum a nih thu leh, LPG hmangtu zawng zawngte chu an him tlan nan endiktute ṭha taka lo thawhpui turin a ngen bawk.