Gas distributor-te hriat tur tichhuak

Food, Civil Supplies & Consumer Affairs department chuan sorkar laipuia Ministry of Petroleum & Natural Gas-in chhungkaw khawsak harsa, hmeichhe puitling pakhat tal awmnate tan a thlawnna gas connection a tihsakna, Pradhan Mantri Ujjwala Yojana (PMUY) chungchangah Mizoram gas distributor-te zawm tur inkaihhruaina a tichhuak.

FCSCA chuan, PMUY gas connection pek chhuah theih hun chu March 31, 2026 thleng hawn a nih thu a tarlang a, "Mizorama gas distributor ṭhenkhatin connection diltu ṭhenkhatte harsatna an siamsak tih hriat a ni a, inkaihhruainate hi PMUY connection thar pek chhuah kawngah gas distributor-ten an zawm ngei tur a ni," a ti.

GAS DISTRIBUTOR-TE ZAWM TUR

▶ PMUY connection diltu, anmahnia online-a dilna thehlut thei lote chu distributor-in an buaipui a ni.

▶ PMUY connection diltu awm lai ngeiin distributor-te'n an buaipui nghal tur a ni.

▶ e-KYC document endik, biometric leh dilna kimchangte a diltu awm lai ngeiin an tifel tur a ni a, receipt an pe nghal ngei tur a ni.

▶ Hmun hla tak leh sum leh pai tam tak sênga kal, khawsak harsa tak tak, PMUY connection diltute chu a ṭul tawpkhâwkah lo chuan distributor-te'n kal nawn ngaiin an siam tur a ni lo.

▶ Distributor zingah he thupek ngai pawimawh loa harsatna siam an awm chuan danin a phal chinah an chungah khauh taka action lak a ni ang.

▶ District thuneitute leh a kaihhnawih official-te chuan PMUY kalpui dan uluk taka enfiah an tum ang a, thil dik lo leh felhlel a awm a nih chuan department-ah an report tur a ni.