Party thu anga CAB thlawp zawnga vote turin kan MP kan ti - Zoramthanga

MNF president leh chief minister Zoramthanga chuan, Citizenship Amendment Bill (CAB) chungchangah, mahni rawtna ang do zawnga vote thlak a puitlin loh avangin an MP pawh CAB vote tura an tih thu a sawi a; Lok Sabha MP C Lalrosanga'n CAB a thlawp chu party thutlukna a nih thu a sawi.

Zoramthanga hian nimin khan Mizo Hnam Rûna inkhawmah thu sawiin, CAB chu bill a nih laiin MNF chuan ṭha an ti lo a, theihtawpin an do niin a sawi a, "Political party dang, kohhran leh NGO-te pawhin ṭha an ti lo a, an do. Kan vawiin Mizoram tan kan duh lo a, kan ṭang tlang. Union Home minister Amit Shah a lo kal pawhin political party, NGO leh kohhrante'n 'Mizoram tan a ṭha lo huamtir ve suh u' tiin kan nawr tlang a ni," a ti.

Chief Minister chuan, Amit Shah-a'n Mizoram tana harsatna thlen lo zawnga CAB kalpui a nih tur thu a sawi tih tarlangin, "Amit Shah hian a chhukthlak hnuah political party leh NGO-te CAB sawipui turin a sáwm leh a, kan sawi ngai bawk kan sawi. Mizoram tan a ṭha kan ti lo a, Mizoram a tel ve tur a ni lo tiin kan ṭang tlang," a ti a; Amit Shah chuan Mizoram tana harsatna thlen lo tura an tih thu a sawi nawn leh thu a sawi a ni.

CAB chu an duan dan (draft) pek an nih loh avangin an ngaihngam chuang lo tih sawiin Zoramthanga chuan, "CAB dan draft an sem a, ILP leh 6th Scheduled-in a huam an tel loh tur an tichiang ta. ILP leh 6th Scheduled-in min huam avangin telh loh kan ni ta a, chu chu Parliament-a an pharh a ni," a ti.

Chief Minister chuan, Parliament-a CAB pharh tâk chu NGO, political party, zirlaite leh kohhrante nawrna angin Mizoram telh lohna a nih thu sawiin, "Mahni rawtna do zawnga vote thlak a puitling lo. Chuvangin, kan MP pawh vote turin kan ti a, party thua ti kan ni e," a ti a; CAB-in Mizoram a huam loh avangin NGO leh pawl ṭhenkhat pawhin mipui hnenah lawmthu sawina an tihchhuah thu a sawi.

CAB thláwp zawnga Lok Sabha MP an vote tir chhan dang sawiin Zoramthanga chuan, "Khawvel, India leh hnam dangte lakah kan rinawmna lantirna turin, a dodal zawnga chêt leh ṭha kan ti lo. Kan rawt anga pass tur dodal zawnga vote leh si chuan kan dinhmun a puitling lo ang. Rawtna anga pass tur na nâ nã, vote pui kha kan tih tur a ni," a ti.