Pakistan hnehna ní hman a ni

India sipaite'n Pakistan sipai an hnehna ni, Vijay Diwas chu nimin khan India ram hmun hrang hrangah hman a ni a, Mizoramah pawh Aizawla War Memorial, Treasury Square-ah hman niin, ram tana nunna hlântute zahna leh chawimawina pangpar hlan a ni.

India ramah kum tin December 16-ah Vijay Diwas hman ṭhin a ni. Nimina Aizawla hmannaah hian Governor PS Sreedharan Pillai chuan sipai martarte zahna lantir nan War Memorial-ah pangpar a dah hmasa ber a, Home minister Lalchamliana, chief secretary Lalnun-mawia Chuaungo, director general of police (DGP) SBK Singh, Home secretary Lalbiakzama, Aizawl DC Vanlalngaihsaka leh sipai hotute'n an dah ve bawk.

Bangladesh-in zalenna an sual laiin, December 16, 1971 khan Ramna Race Course, tuna Suhrawardy Udyan ni ta, Bangladesh khawpui Dhaka-ah India sipai hotu Lt.Gen. Jasgit Singh Aurora hnenah Pakistan sipai Gen. Amir Abdullah Khan Niazi leh a sipai 93,000 chu India lakah tláwmin an inpe a ni. Chu hnehna ni hriat reng nan chuan India ramah leh Bangladesh ramah kum tin Vijay Diwas hman a ni ṭhin. India leh Pakistan indonaah hian India-in hnehna a chan avangin Bangladesh ram chu Pakistan aṭanga zalenna neiin independence a neih phah a ni.