KHAWTHLIR

Saitual DC C Lalpeksanga chuan hriattirna chhuahin, Seling - Champhai kawnga Keifang leh Tuivawl inkar chu vawiin aṭanga siam ṭan a nih dawn avangin, lirthei tlan theih hun siam a nih thu a tarlang. Ruahman dan chuan, December 17-22, 2019 chhungin chawhma dar 10 aṭanga chhun dar 12 inkarah lirthei tlan theih a ni dawn a, December 23-25 chhungin chawhnu dar 1 aṭanga dar 2 inkarah lirthei tlan theih a ni bawk ang. Hun dang zawngah chuan kawngpui khâr a ni dawn.

Mizoram State Games neih zawh taka Mizoram police, an awmna bial tana medal late chu nimin khan DGP SBK Singh chuan a lawmpui a, hma an sawn zel theih nan ṭan la zel turin a fuih. Police mi leh sa, an awmna bial ṭheuh aiawha State Games-a tel zingah mi 50-in medal 63 an la a, gold medal 22, silver medal 21 leh bronze medal 21 a ni.

46 Assam Rifles huaihawta chawlhkar hnih thanga Nation Interaction Tour neia zin chhuakte chu nimin khan Aizawlah an rawn haw a, an rawn haw hi Assam Rifles Loch Hall-ah Governor PS Sreedharan Pillai hoin lo hmuah a ni. Tour-ah hian zirlai 14 leh zirtirtu pahnih an kal a, Delhi, Dehradun leh Mussoorie khawpuite an fang kual a ni. Larsap chuan, India ram chu hnam chi hrang hrang lungrual taka khawsakna hmun a ni tih sawiin, "Inpumkhatna atan thil pawimawh tak chu inhriat chian tawnna leh inzahtawnna a ni," a ti.

Kolasib District MJA chuan Christmas Charity atana sum an thawh khawmte chu nimin khan TNT, Kolasib hnenah hlanin, Rs. 18,500 an pe a; Golgotha Camping Centre, Vairengte hnenah Rs. 11,500 an hlân bawk.

Mizoram Truck Owners Association (MTOA) chuan thuchhuah siamin, December 18, 2019 khian Chaltlang Lily Venga an pisaah inkhawmpui an hman dawn thu an tarlang a, an member-te tel vek turin an hriattir.