KHAWTHLIR

GAC-in thisen pe

Aizawl College NSS chuan nimin khan an hmunah thisen pek rûnpui an huaihawt a, Civil Hospital, Aizawl Blood Centre tan thisen unit 250 an pe a, petute mipa 203 leh hmeichhia 47 an ni.

Zotlang Stadium tihlen theihah ngai

Sports and Youth Services minister Lalnghinglova Hmar chuan nimin khan Assembly session-ah ZPM member Lt Col. Clement Lalhmingthanga zawhna chhangin, Champhai Zotlang Sports Stadium chu UDPA department hmalakna ni mah se, sum a awm chuan phùllem phah ṭhata tihlen theih tura a ngaih thu a sawi. Sorkarin sum a neih dan leh mamawh dan ang zelin coach lak belh ṭhin a nih thu a sawi bawk.

Maua hmalakna Minister-in sawifiah

Horticulture minister C Lalsawivunga chuan nimin khan ZPM MLA pathum - V Malsawmtluanga, Lt Col. Clement Lalhmingthanga leh T Lalhlimpuia te zawhna inṭâwm chhangin, State Bamboo Mission, Mizoram chuan mau chìn pun leh mau sâwngbâwlah inzirtirna leh ṭanpuina a pe ṭhin tih a sawi. Bamboo Processing Unit kalpui zel a nih thu leh, Integrated Bamboo Park siam turin chak taka hmalak mek a nih thu a sawi bawk.

Tuiah tla hlum

March 10, 2026 khan C Lalngaihsaka (22), Mualṭhuam North chu Mat luiah a tla hlum. Thu dawn danin, C Lalngaihsaka hi a ṭhiante nen balu lain Mat luiah an kal a, balu an lak zawh hnua tuia an chên laiin a chesual a, a tla hlum a ni. C Lalngaihsaka hian tun hnaiah nupui a nei a, a nupuiin nau a pai mek a ni.

Hnu chhui sawiho

Lunglei SP J Lalmuankima kaihhruaiin March 10, Thawhlehni khan Lunglei SP conference hall-ah police hnuaia hnu chhuitu, case investigating officer (case IO)-te leh Lunglei District Court-a sorkar ukil (public prosecutor)-te an inkâwm. Dan bawhchhiatna a thlen chánga hnu chhui dan tur te, hnu chhuinaa fimkhur leh ṭan lak ngaihna laite sawiho a ni.

Ramhmul damdawi enkawl dan inzirtir

Mizoram State Medicinal Plant Board leh Krishi Vigyan Kendra (KVK), Kolasib te chuan nimin khan KVK, Kolasib-ah tualṭo ramhmul damdawi chìn pun dan leh enkawl dan inzirtirna an buatsaih. Khaw 11 aṭangin kut hnathawktute an tel a, district medical officer (AYUSH) Dr C Vanlalhlimpuia'n hmanpuiin, mithiamte'n thil pawimawhte an zirtir a ni.

Jal Arpan Diwas

PHE department-in Darzo leh Tuipui South khuaa Jal Jeevan Mission (JJM) hmanga tui lakna an siam chu March 10, Thawhlehni khan khawtlang hruaitute kuta hlanna, Jal Arpan Diwas buatsaih a ni. PHE Hnahthial WATSON Division executive engineer Lalhruaitluanga chuan, Mizorama in 1,33,060-ah tui connection pek a nih tawh thu a sawi a, "Sorkar laipuiin a tum ber chu mipuite'n an inah tui herh haw thei se tih a ni," a ti.

Kângmei vên zirtir

Lawngtlai District Committee on Fire Prevention chuan nimin khan Sangau BDO Hall-ah 'Awareness programme on fire prevention' an buatsaih. He hun hi district bawrhsap Donny Lalruatsanga'n kaihruai a, LADC executive member (i/c EFCC) HC Lalengkima'n hmanpuiin, kângmei tichhuaktu ni lo tur leh kângmei chhuak ṭhelhtu ni ṭheuh turin mipui a sáwm.