MNF-in Exodus Day an hmang

MNF party chuan nimin khan Mizo Hnam Runah Exodus Day leh a pisa kumin atana khârna inkhawm an buatsaih a; MNF president Zoramthanga chuan, anmahni beitu tam ber chu MNF-ah an la luh zel tur thu a sawi.

Zoramthanga chuan, December 16, 1971-ah India sorkarin a beihnaah Pakistan a ṭan zawh loh thu sawiin, "Dhaka chu a fall (tlu) ta a ni. Khatih lai khan Pu Denga hoin khawiah nge kan tlan chhuah ang kan ti a, kan mangang lutuk chu kan ṭawngṭai a ni. Tuipui hual velna lo chu tlan chhuahna tur a awm lo. Chittagong lam India sipai kan tihthimrim lohna kawngah kal ṭha kan ti a, kan ṭawngṭai zawh rualin Faruah lui, Tatkawng lui lamah Pakistan Major a lo kal a, kalna tur min rawn kawhhmuh a, chumi lamah chuan lawng awm ang angin kan chhuak thei ta a ni," a ti.

MNF President chuan, inkahna vawi hnih tan tlangin an sut kuak zel thu sawiin, "Anni sipai nuai chuang an man laiin, keini zawng kan him pial a, kan tan chuan Tuipui sen kan kân ang a ni. Thil mak chunga thilmak chherchhuan niin, Pathian chuan 'Pathian leh kan ram tan' titute chu min hruai chhuak a ni. Hruai chhuah kan nih chhan kha kan thuthlungpui a mit lohna turin Pathianin min hruai chhuak a ni," a ti a; hnam movement chuan harsatna hrang hrang a sut tlang thu a sawi.

Chhung lamahte indonate a awm ṭhin thu sawiin Zoramthanga chuan, "Kan paltlang zel a, kawng chanveah Pathian hian min kalsan lo ang. Arsi hi a eng zual zel ang a, kan inthlan leh hunah pawh tuna MLA 27 ai hian MLA kan neih tam ka ring. Min beitute hian Mizo nationalism hmanga min beih an tum a, ram hmangaih lo anga min chhuah an tum a, MNF ho kan chungchuanna leh sawi theih awmchhun chu kan hnam martarte thlanmual hi a ni. Vawiina min beitu tam ber pawh MNF-ah an la rawn lut zel dawn," a ti.

MNF senior vice president Tawnluia pawhin thu sawiin, "Hun harsa leh khirhkhân zawng zawng paltlanga min hruai chhuaktu Lalpa hian engtik níah emaw chuan Zo fate hi min la hlangkai ang. Engkima Lalpa hming lam zel hi kan kal leh zelna tur atan ka inchah duh. Ṭhenkhat chuan ropuina leh hausaknate an ngainá a, hausakna a nih dawn phawt chuan nationalism engahmah an ngai lo," a ti a; MNF mawina ber chu nationalism thinlung a nih thu a sawi.

Inkhawm hi MNF vice president Vanlalzawma'n a kaihruai a, martarte sûnna hun an hmang a ni. Mizo Hnam Run chu January 30, 2020 ah hawn leh a ni ang.