Viksit Bharat chungchang inhrilhfiah

Ministry of Information and Broadcasting hnuaia Central Bureau of Communication (CBC) Field Office, Aizawl chuan nimin khan Pachhunga University College-ah 'Special outreach programme on Nari Shakti & Viksit Bharat @ 2047' an buatsaih.

Inkhawma khuallian, PUC Political Science department HoD Dr Lalṭhakima chuan, Viksit Bharat ni thei tura India sorkarin hma a lakna a hlawhtlin theihna tura pawimawhte ngaihtuah turin zirlaite a fuih.

Khualzahawm Nampibou Marinmai, DDK, Aizawl director chuan, Mizoram chu India rama ziak leh chhiar thiam vekna state hmasa ber a nih thu sawiin, zirna leh khawtlangah hmasawnna thlen tum ṭheuh turin zirlaite a chah a, "Mizoram mipui 50% chuang hi hmeichhia an ni a, anni tel lo chuan Viksit Bharat a puitling thei lo," a ti.

Outreach programme-ah hian PIB/CBC, Imphal regional director Dr Engam Pame, PIB/CBC Aizawl head of office Dr Rajeev Lourembam leh CBC Aizawl field office FPA Lalginlen Lhouvum te pawhin thu an sawi a; resource person Dr K Vanlalhruaitluanga, Economics department, PUC-in Viksit Bharat chungchang a sawihfiah a ni.