Patient's Attendants Shelter hawn a ni

Urban Development & Poverty Alleviation (UDPA) secretary Lamalsawma Pachuau chuan March 10, Thawhlehni khan DAY-NULM hnuaia damlo awmpuitute tana sak riahbûk, Patient's Attendants Shelter, Dinthar Unit a hawng.

Lalmalsawma Pachuau chuan, Patient's Attendants Shelter chu khualkhua leh hmun hla zawk aṭanga damlo awmpuitute riahna tur a nih thu sawiin, "He riahbuk sak hlawhtlin a nih theihna tura hma latu UDPA department hnathawh a ropui a, a hmunhma phal taka petu leh a enkawltu YMA Dinthar Branch te an fakawm tak zet," a ti a; mi harsa zawk leh ṭanpui ngaite ṭanpuina hmun a nih zel theih nan theihtawp chhuah zel turin enkawltute a fuih.

DAY-NULM project director C Lalduhzuali tarlan danin, riahbûk hi Shelter for Urban Homeless, DAY-NULM hnuaia sak a ni a, sq.m. 160.84-a zau niin, Rs 48,32,023 sen a ni. Chhâwng thuma sang niin, khum 15 dah sa a nih bakah, Dinthar Branch YMA ṭhahnemngaihnain khum eng emaw zat dah belh a ni a; mutbu leh bungrua eng emaw zat a awm.

Riahbûk hawnna inkhawm hi UDPA director Jacob Lalawmpuia, DAY-NULM state mission director ni bawkin a kaihruai a; Dinthar Branch YMA member-te leh Local Council member-te an tel.