Sipai bángte sorkarin a thlahthlam dawn lo - Home Minister
Mizoram Ex-Services League (MESL) chuan nimin khan 46 Assam Rifles hmuna Loch Hall-ah General Assembly-cum-Vijay Diwas Celebration an hmang a; khuallian Home minister Lalchamliana chuan, sipai bángte chu Mizoram sorkarin a ngaihsak reng tur thu leh a thlahthlam dawn loh thu a sawi.
Home Minister chuan, ramin a ngaih pawimawh hmasak ber chu ram himna a nih thu sawiin, "Hna ropui leh zahawm thawktu, lungmuang taka kan awm theihna atana an ṭhat lai hun hlântu sipai leh sipaia ṭang tawhte hi an zahawmin an ngaihsan awm a ni," a ti a; amah pawh ex-servicemen fapa a nih avangin a inchhuan thu a sawi.
Mizoram sorkarin ex-servicemen-te nihna a ngaihhlut thu sawiin Lalchamliana chuan, "An hamṭhatna tur kawng hrang hrangin a ngaihtuah a, an pension hlawh pawh thla tin Rs. 1,200 aṭangin Rs. 2,400-ah tihsan a ni. Tling an awm chuan Mizoram sorkara group 'B', 'C' leh 'D' hnaah 5% hauhsak an ni a, a ṭul anga ngaihhnathiamna pawh pek an ni ang," a ti.
Home Minister chuan, Mizo ṭhalai sipaia ṭang an tlem ta chu a vei thu sawiin, Mizo ṭhalaite sipaia ṭang tura fuihna kawngah theihtawp chhuahpui turin sipai bángte a sáwm a, "Sipai officer chin phei chu chhiar tham lek an ni. CRPF battalion Mizo ṭhalai hlang awmna pawh neih beisei mek a ni," a ti. Mizo sipaite chu an awmna hmun apiangah an hmingṭhat ṭhin thu leh phai lama Mizo awmte pawhin an thlamuanpui ṭhin thu sawiin, sipaia
ṭang mekte chu Mizo ze mawi chhawm nung zel turin a chah.
Inkhawmah hian sipai martar nupui mi pakua hnenah an pasalte ram tana an nunna hlu tak an hlan avangin chawimawina an hlân a ni. MESL-ah hian ex-servicemen 5,920 leh Assam Rifles ex-servicemen 600 an awm mek a, martar nupui (veer narris) 10 leh hmeithai 4,107 an awm.
Kum kal ta chhung khan an member mi 31 an thi a, member thar 69 an nei thung. Lunglei, Siaha, Kolasib leh Champhaiah sub-headquarters an nei a, sub-unit 91 an nei bawk. Mizorama TA (Eco) battalion hnih din tur leh scout battalion din turin sorkar laipui an nawr mek a ni.