Mizorama Taiwan Education Centre Hawnna turin inremna ziah a ni

Mizoram Youth Commission (MYC) leh Taipei Economic and Cultural Centre, India-te chuan Mizorama Taiwan Education Centre hawnna turin nimin khan inremna thuthlung an ziak.

Thuthlung ziahna inkhawm hi MYC pisaah neih a ni a; MYC aiawhin chairman Dr Vanlalṭanpuia, MLA-in hming ziakin, Taipei Economic and Cultural Centre aiawhin Peters LY Chen, representative, director, Education Division, Taipei Economic and Cultural Centre (TECC), India-in hming a ziak thung.

Dr Vanlalṭanpuia leh Peters LY Chen te hi nimin khan MYC chairman pisaah an inkawm a, Mizorama Taiwan Education Centre hawnna tura ṭul leh pawimawhte an sawiho a ni. Inremna an ziah angin, Taiwan Education Centre hnuaiah Mizo ṭhalaite Mandarin Chinese ṭawng zirtir an ni dawn a; Mizoram zirlai leh ṭhalaite tan Taiwan university leh college-te leh MYC thawhhona ṭha zawk neih theih dan tur thlengin a huam a ni.

Dr Vanlalṭanpuia chuan, inremna thuthlung an ziah chuan Mizo ṭhalaite tan remchanna tam tak a siam an beisei thu leh, inremna angin February 2020 velah bul ṭan theih a beiseiawm thu a sawi.