CAA duh lohna lantirtute man an dem

ZPM party ṭhalaite chuan thuchhuah siamin, Mizo Hnam Rûn kawta Citizenship (Amendment) Act, 2019 (CAA) duh loh­na lantirtute dan bawh­chhetu ang maia dimna tel loa man an ni chu mipui hmuhsitna lian taka an ngaih thu an tarlang.

ZPM ṭhalai chuan, CAA vanga Mizorama lungawi lohna lantirte chu MNF party-te inthlan dawna an thutiama an din ngheh loh vang a nih thu an sawi a, "Lok Sabha MP Pu C Lalrosanga'n CAB a thláwp chu a tih tur dik tak a nih thu an party thu­chhuah hmanga an puan chhuah te, social media lama an party mite'n an chapopui zawk emaw tih tura post leh comment an siam vak vakte leh, Mizo Hnam Rûn kawta buaina siam loa CAB/CAA duh lohna lantirtute dan bawhchhetu ang maia dimna tel loa man an nite hi Zoram mipui hmuhsitna lian tak ni," an ti.

MNF party chu MLA leh MP inthlan dawnah CAB duh lotu nia insawi an nih thu sawiin ZPM ṭhalai chuan, "Pu Zoramthanga'n CAB Parliament-a pass a nih chuan NEDA-a BJP nena an inzawmna chhut chah a nih tur thu te, Lok Sabha MP Pu C Lalrosanga pawhin thlan tlin a nih chuan a tàwp thlenga CAB a do tur thu a sawi a ni," an ti a; chu'ng an thusawi chu Zoram mipuiin CAB a pumhlûma an duh lohna leh donaah an ngai veka a rinawm thu an sawi.

ZPM ṭhalai chuan, MNF party-in inthlan dawnah CAB an duh loh thu uar takin sawi mah se, MNF party rilru puthmang dik tak chu Parliament-ah fiahin a awm thu sawiin, "Kan Lok Sabha MP neih­chhunin CAB-in Mizoram a huam loh avanga lawmawm a tih thu leh a thlàwp thu a sawi hian Zoram mipui min barakhaih a, CAB do tura eizawnna kalsana hun leh thâ sênga kawng zawhtu te, ṭawngṭaina tam tak hlantute leh Zoram mipui rilru an tina tak zet a ni," an ti. 

ZPM ṭhalaite chuan, CAA-in Mizoram a huam lo chu Mizoram leh Mizote dikna chanvo a nih avangin, sorkar laipuia BJP sorkar hnena lawmthu sawi Mizoramin a bat loh thu leh, CAB thlàwp chu Mizo hnam leh Kristianna tihmualphona a nih thu an tarlang bawk.