Mizo ṭawng chungchanga Assembly House resolution-ah CYMA an lawm

Central YMA chuan, Mizoram Legislative Assembly session neih mekah India Danpui 8th Schedule-a Mizo ṭawng dah a nih ve theihna tura 'Eighth Schedule to the Constitution of India-ah Mizo ṭawng hi telh tura hmalak ni rawh se,' tih resolution pawm a ni chu lawmawm an tih thu an tarlang.

CYMA chuan thuchhuah siamin, 8th Schedule-ah Mizo ṭawng dah a nih theih nan YMA-in theihtawpa hma a lak tawh ṭhin thhu an tarlang a, "8th Schedule-a Mizo ṭawng telh ve a nih theih nan CYMA chuan theihtawp a chhuah zel dawn a ni," an ti.

Zo hnam pêng hrang hrangte ṭawng humhalh a, tihhmasawn a nih theih nan YMA-te'n hma an la thu sawiin CYMA chuan, "Mizo ṭawng hi kan inbiakpawhna ṭawng tlanglawn ber a nih avangin inpumkhatna atan a pawimawh a, hma a sawn theihna tur leh a ṭhan zelna turin CYMA chuan hma a la mek zel," an ti bawk.

CYMA tarlan danin, kum 1997-a YMA General Conference-ah 'Mizo ṭawng hi India Constitution 8th Schedule-ah telh a nih theih nan YMA-in hmalak ni rawh se' tia rêl a ni. Chuta ṭang chuan India President, Vice President, Prime Minister, Home Minister leh hotu dangte hnenah ṭum eng emaw zat lehkha an thehlut tawh a; CYMA hruaitute New Delhi-ah ṭum hnih kalin Ministry of Home Affairs hotute hnenah an thlen tawh a ni.