CAB hmanga Mizote hralhah MNF puh

ZPM Southern Headquarters, Lunglei president V Malsawmtluanga chuan, MNF party hruaitute chu Mizo mipuite hralhah a puh a, ZPM chuan Mizo ram, hnam leh sakhua tana him lo reng reng chu an do zel dawn thu a sawi.

Nimina Lungleia ZPM pisa khàrna inkhawmah thu sawiin V Malsawmtluanga chuan, MNF-te'n an sorkar hunah chhung tin hnenah cheng nuai thum ṭheuh sem leh thil dang eng emaw zat an tiam tih a sawi a, "An thutiamte kha an tihhlawhtlin theihna atan sum tam tak an mamawh a, chuvangin, sum an hmuh theihna atan kan ram kan hnam leh kan sakhua tana him lo, Mizo mipui pawhin kan duh loh CAB hmangin min hralh ta a ni," a ti.

Lunglei ZPM ṭhalai President chuan, "Kan ram, kan hnam leh kan sakhua dah pawimawh hmasa thei loa sum an ûm a ngai ta hi pawi kan ti a, a chhan chu Congress leh MNF party-te'n ram min kaihhruai ṭhin dan dik loh vang a ni," a ti a; Lok Sabha MP C Lalrosanga a khawngaih thu sawiin, "Inthlan hmaa a thutiam, a tàwp thlenga CAB a do tur thu a sawi pawh ding tlang thei lo tura siamtu chu MNF party hruaitute an ni," a ti bawk.

ZPM Southern Hqrs. treasurer Lalrinpuii pawhin thu sawiin, CAB/CAA avangin India rama buaina nasa tak a chhuah mek thu a sawi a, "CAA hian sakhuana hmangin Pakistan, Afghanistan leh Bang­ladesh aṭanga sakhua vanga tihduhdah tuartu, December 31, 2014 hmaa lo lut, kum 5 tal India-a awm tawhte India khua leh tui nihna pek a tumna dan a ni. Citizenship pek a tumte hi Hindu, Sikh, Jain, Buddhist, Parsis leh Kristiante an ni a; Muslim-te erawh tihduhdah tuar an nih pawhin India khua leh tui nihna an hmu ve dawn lo a ni," a ti.

Lalrinpuii chuan, CAA chuan Indian Constitution-a Article 14 leh 15 te, sakhua vanga inthliarna awm loh tur dan a kalh tlat tih a sawi a; BJP sorkar hmalakna lian tham reng reng chu Hindu hamṭhatna atana duan a nih zel thu a sawi bawk.