Chapchàr Kût hlim taka hman a ni

Nimin khan Mizoram hmun hrang hrangah Chapchàr Kût hlim taka hman a ni a, Aizawlah chuan Lammualah hman niin, mi ṭhahnem tak an tel. Chief Minister chuan, Chapchar Kût hmanna kaltlangin Mizoram dung leh vângah inremna thleng se a duh thu a sawi.

Lammuala Chapchar Kût hmannaah hian chief minister Lalduhoma kût pa niin, Art & Culture minister C Lalsawivunga kût thlengtu a ni a, Kût thupui chu 'Zo nun ze mawi - Inremna' tih a ni.

Chapchàr Kûtah hian Zo hnahthlak hnam nunphung, lâm leh zaite entir a ni a; mimal leh huho zai ngaihthlak a ni a; Meghalaya leh Sikkim hnam làm entir a nih bakah, Wales aṭanga rawn tel Lleuwen Steffan a zai. Lawmman leh chawimawna hrang hrang sem a ni.

Kût Pa chuan, Chapchàr Kût chu pi leh pute'n eizawnna bul an ṭanna leh kum thar inṭanna a nih thu sawiin, "He ní ah hian inhauh an âwih ngai lo. Kan thupui 'Zo nun ze mawi - Inremna' hi kan pi pute hman dan nen a inhmeh hle. He ni kan hmanna denchhen hian kan ram dung leh vâng tluanah inremna lo thleng rawh se," tiin, mipui duhsakna a hlan a; Chapchar Kût chhawm nun zelnaah Bible nena inrem thupui hman a ni chu ṭha a tih thu a sawi.

Inremna a awm theih nana pawimawh chu mawhphurtu nih ngamna a nih thu sawiin Lalduhoma chuan, "Social media-ah te sim tur tam tak kan nei a, inremna a awm zel theihna turin kan thu post-ahte pawh hian mi ti-na lo zawng leh inrem lohna thlen tirtu ni lo tura kan fimkhur a ṭha," a ti.

Chief Minister chuan, Mizoram politics-ah Zo nun ze mawi nena inmil lo thil thleng a awm ṭhin thu sawiin, "Mizote'n kan chìn ngai loh lim hâl thlenga kan chîng ve ta hi a pawi ka ti em em. Chapchar Kût, inremna kût kan hmanah hian hengte hi sim a ṭhain ka hria," a ti a; political party-te chu inkhak bap bap ṭhin mah se, a takah an inhuat loh thu a sawi.

Kohhran pawl hrang hrang inkarah remna awm se a duh thu sawiin Lalduhoma chuan, "Chhungkuaah inremna lo awm se la, ṭhenawmte nen inrem ila, kan khawtlangah, kan ram dung leh vangah hian inremna lo awm zel se ka duh tak zet a ni," a ti.

Chief Minister chuan, inremna chu Mizo lalte leh upate'n an ngaihlu tih sawiin, "Ro an rêlna tinrengah chalrem leh saui tan dan hi thiam takin an hmang ṭhin. Inremna atana thil pawimawh tak chu a mawhphurtu nih ngamna leh a ṭul anga thupha chawi ngamna hi a ni. Kan thiam lohna leh fel lohnateah mi dang puhmawh lo a, 'Ka thiam loh a ni e, ka mawh a ni e' tih ngamna hian inremna te, damnate a thlen ṭhin," a ti a; Kût hman aṭangin mawhphurhna la ngam tura huaisen thar turin mipui a chah.

Kût thlengtu C Lalsawivunga chuan, Chapchar Kût awm chhan leh hman chhan ber kut hnathawktute leh kût hmangtute kût chibai a bûk a; Chapchar Kût hmang uar zel a, ngaihlu zual deuh deuh turin Mizo mipui a ngen.

Art & Culture Minister chuan, kumina Chapchar Kût chu March 9, 2026 zing kara kût puala tlân hmangin bul ṭan a nih thu sawiin, "Handloom textile & handicraft exhibition, food processing & food court, flower show, living museum, painting exhibition leh flim show tein kan chhunzawm a, mipui leh khualzinte'n an hlut hle a ni tih kan hmu a, hmasawnna lawmawm tak a ni," a ti.