KHAWTHLIR

Lengpui-Mamit kawng siam tum

PWD minister Vanlalhlana chuan March 12, Ningani khan Assembly session-ah MNF member Dr R Lalthangliana zawhna chhangin, Lengpui aṭanga Mamit panna kawngpui siam tum a nih thu a sawi a, "Tender mek a ni a, hna ṭan theih thuai beisei a ni. Hemi hma hian a chhe zualpui lai siam kan tum," a ti.

Crystal meth man

Mizoram Police-a CID (Special Branch) chuan March 12, Ningani khan Chaltlang Dawrkawnah Tongbram Priyobarta Singh (50) s/o Tongbram Ibotombi Singh, Hastal Village, Uttam Nagar, West Delhi district nia inchhál hnen aṭangin crystal meth kg 10.369 an man. Thu zawhfiahna aṭangin ruihhlo hi Guwahati lama ken tur a ni.

MLA-in lirthei hlan

Aizawl West-III bialtu MLA VL Zaithanzama chuan nimin khan a bial chhunga Mission Vengthlang Branch YMA hnenah MLA fund hmanga a lei lirthei (Super Carry) a hlan. VL Zaithanzama chuan, "Motor hi ka pek a ni lo a, MLA ka nih vanga fund hmanna tur buaipuitu ka nih angin khawtlang mamawh motor hi kan ngaihtuah tlâng a ni," a ti.

Buh chi sem

Krishi Vigyan Kendra, Lunglei, Hnahthial leh Indian Council of Agricultural Research: Indian Institute of Rice Research, Hyderabad chuan March 12, Ningani khan South Vanlaiphai community hall-ah kut hnathawktute tan nutrient pai tam bik buh chi chhuak thar (variety - DRR Dhan 67 & 69) chungchang inhrilhfiahna an buatsaih. Kut hnathawktute hnenah buh enkawlna tura mamawhte sem nghal a ni.

Sangha insurance

Fisheries department leh National Fisheries Development Board chuan March 12, Ningani khan Mamit district-a Darlak community hall-ah Aquaculture Insurance Awareness Campaign an buatsaih. Tuikhuah neitu mi 50 an tel a, khuarel chhiatna avanga tuikhuah chhiate leh natna hrang hrang vanga sangha chánte'n an tuikhuah leh sanghate insurance an tih theih dan tur inzirtir a ni.

Minister-in sikul leh hostel hawng

Home minister K Sapdanga chuan nimin khan Lawngtlai College Venga Residential School aṭangin a rualin Residential School, Sadbhav Mandal Chawnhu, Lawngtlai leh Chawngte Girls' Hostel te a hawng. Minister hian Residential School hi LADC hnenah a hlan nghal a, Lawngtlai Girl's Hostel chu Lawngtlai College hnenah leh Chawngte Girl's Hostel chu Chawngte College hnenah a hlan a, Sadbhav Mandap chu Management Board kutah a hlan nghal bawk.