Mizoram pumah Chapchàr Kût hman a ni

Mizoram hmun hrang hrangah nimin khan Chapchar Kût hman a ni a, minister leh MLA-te bakah, sorkar hotute'n district khawpui hrang hrangah an hmanpui. Kûtah hian chawimawina leh intihsiakna lawmman hrang hrang sem a ni a; hmun ṭhenkhatah ruah a sur nasat avangin hun ruat lâwk anga hmang thei lo an awm.

Chapchar Kût hi Lungleiah chuan C Ṭhuamluaia Mualah hman a ni a, Lunglei High Powered Committee (HPC) vice chairman V Malsawmtluanga, MLA kut pa niin, district bawrhsap Navneet Mann kut thlengtu a ni.

Mizo Upa Pawl ten hlado an chham hnuah YMA branch 19-te'n cheraw (buh-za-aih) an kân a; Mizo hnam zia lantir thei thil chi hrang hrang entir a nih bakah, zaithiam eng emaw zat an zai. Kumina Fire Prevention Week-a reels insiamsiak lawmman sem nghal a ni a, Mizo siam thil chi hrang hrang zawrhna dawr eng emaw zat siam a ni. Kût Lanu leh Kût Hraite (mipa leh hmeichhia) thlan a ni bawk.

Siahaah chuan Vaihpi Field-ah Chapchar Kût hman a ni a, district bawrhsap VL Hruaizela Khiangte kut pa niin, MADC chairman N Viakhu kût thlengtu a ni. Siaha district-a mi hmingṭhate hnena hlan ṭhin 'Chawimawina Nopui' chu Prof. Chawngkhuma Chawngthu hnenah hlan a ni a, hnam lam leh incheina chi hrang hrang entir a nih bakah, chanchinbu ṭha lawmman sem a ni.

Champhaiah chuan Zotlang Sports Stadium-ah Chapchar Kût hman a ni a, adviser to chief minister TBC Lalvenchhunga, MLA kût pa niin, Champhai district bawrhsap Mohammad Aaquib chu kût thlengtu a ni. MUP-in hlado an chham a, Mizo hnam làm leh hmanlai Mizo thuamte entir niin, malzai leh zaipawl zai nen hun hman a ni a; Mizo thuama inchei nalhte leh Kût Pa leh Kût Nu thlan a ni.

Kolasib-ah chuan Kolasib Sports Stadium-ah Chapchar Kût hman a ni a, bialtu MLA leh Assembly deputy speaker Lalfamkima kut pa niin, district bawrhsap Robert C Lalhmangaiha kût thlengtu a ni. Mizo hnam làm chi hrang hrang entir a nih bakah, zaithiamte an zai a, MUP-in Kût pualin hlado an chham.

Serchhipah chuan Leisekawt Mualah minister of state Prof. Lalnilawma hoin Chapchar Kût hman a ni a, bawrhsap Paul L Khuma kût thlengtu a ni. Kût pualin Mizo thang (trap) hrang hrang 14 - thangthlêng, thangpui, vaithang, be-ái, khaileng, sahdàl, thangchep, kar, fal, mangkháwng, hnawhtawt, kawlper, vawmtlak leh aiawt te pho chhuah a ni a; mual sirah Commerce & Industries buatsaihin stall chi hrang hrang hawn a ni. Miss Chapchar Kût an thlang bawk.

Lawngtlaiah chuan DC pisa tualah Chapchar Kût hman niin, Home minister K Sapdanga kut pa a ni a, bawrhsap Donny Lalruatsanga kut thlengtu niin, adviser to CM Dr Lorrain Lalpekliana Chinzah chu kût uaptu a ni.

Chapchar Kût hi Mamitah chuan Mangkhawngdai Tennis Court-ah hman a ni a; DRDO project director Malsawmzuala kût pa niin, Sub-Hqrs YMA president Vanlalchhuanga Chhangte kût thlengtu a ni. Mamit khawpuia YMA branch hrang hrangte'n cheraw an entir a, YMA branch-te bakah, MHIP, Mizo Cultural Organisation aṭangtein hnam làm chi hrang hrang entir niin, zaithiamte an zai a ni.

Saitualah chuan Public Playground-ah Chapchar Kût hman a ni a, minister of state B Lalchhanzova kut pa niin, bawrhsap Srinivas Sadi kût thlengtu a ni. Saitual khawpui huam chhunga YMA branch hrang hrangte leh YMA Sub-Hqrs Cultural Troop ten cheraw kânpui an entir a; MHIP Sub-Hqrs aṭangin Siktuithiang làm, YMA chhangte'n pawnto, MUP-te'n hlado an entir. Saitual College zirlaite'n Mizo thuam hrang hrang entirna kawngzawh an nei a, zaithiamte an zai bawk.

Hnahthialah chuan Denlung Pasalṭha Mualah bialtu Chapchar Kût hman a ni a, bialtu MLA Jeje Lalpekhlua kût pa niin, bawrhsap K Vanlalruati kût thlengtu a ni. Zaipawl, malzai leh hnam làmte entira ngaihthlak a nih bakah, Kût Nula, Kût Tlangval leh Kût Mipa Naupang leh Kût Hmeichhe Naupang thlan a ni.

Minister of state Lalnghinglova Hmar chu Thenzawl Loṭhazawla Chapchar Kûtah kût pa a ni a, Vantawng Group YMA president C Lalnunthara kût thlengtu a ni. Thenzawl Cultural Club, YMA branch-te leh Mizo Cultural Organisation ten hnam làm an entir a, zaithiam eng emaw zat an zai bawk.

Chawngte khelmualah pawh Chawngte Group YMA huaihawtin Chapchar Kût hman a ni a; Lunglei South bialtu MLA Lalramliana Papuia kût pa niin, Chawngte SDO (Civil) Lalnunpuia Renthlei kût thlengtu a ni. YMA, MHIP leh MUP ten hnam làm chi hrang hrang an entir bakah, hnam zia chi hrang hrang pho lan a ni a, hmanlai Mizo nun lantirna lemchan entir a ni.