Kum kal taah Mizoramin tlawhtu mi nuai ruk dawn a nei - Sapdanga

Home minister K Sapdanga chuan, kum kal ta chhung khan Mizoramin tlawhtu mi nuai ruk dawn a neih thu sawiin, khualzinte'n Mizo hnam chìn dante hmuh an duh ṭhin thu a sawi.

K Sapdanga hian nimin khan Lawngtlaia Chapchar Kût a hmanpuinaah thu sawiin, "Kum kal ta chhung khan Mizoram hian tlawhtu mi nuai ruk dawn lai kan nei a, hei hi kum hmasa lama tlawhtu kan neih lêt ruk dáwn lai a ni. Hetianga min tlawhtute'n an rawn hmuh duh chu kan hnam chìn dan hlui ṭhangtharte'n an chhawm nun tâkte hi a ni," a ti.

Chapchar Kût chu hlimna leh inpumkhatna ní, hnam zia pholanna leh inhlan chhàwnna ní a nih thu sawiin Sapdanga chuan, "Ni hlu tak a ni. Thlahtute chìn ṭhin hlut nachang hriat hi ṭhangtharte mawh a ni a, pi leh pute sûlhnu leh chìn ṭhinte hlut nachang hre lo chu hnam ral tur zia a ni," a ti a; Chapchar Kût chuan hlimna chauh ni loin, hnam inpumkhatna, tlawmngaihna leh lungrualna thlen se a duh thu a sawi.

Home Minister chuan, Lai hnam chu hnam ze hausa leh entawn tur ngah pawl tak an nih thu sawiin, "Tlang hrang hranga chengte'n khuallam te, cheraw te kan nei ṭheuh a, kan tih dan a hrang hret hret a, chutiangah chuan Lai hnam hian entawn rawn a hlawh viau a ni. Inchei danah, puan thûlkhung neih ṭhatah pawh entawn hlawh tak hnam a ni," a ti.