Lunglei Bawrhsapin kawng siam a enfiah
Lunglei bawrhsap Navneet Mann chuan March 12, Ningani khan National Highway-54 & 302 zauh leh siamṭhat mekte tlawhin, Theiriat-Hrangchalkawn leh Lungpuizawl-Zobawk huam chhunga hmalaknate leh harsatna awmte a enfiah.
Bawrhsap hi sorkar hotu te, NH enkawltu NHIDCL leh an hnuaia kawng siamtu contractor BRN Infrastructure Private Ltd leh Lunglei Sub-Headquarters YMA hruaitute'n an ṭawiawm a; Theiriat leh Zobawk khawtlang hruaitute leh Zobawk Joint YMA hruaitute'n lo dawngsawngin, an harsatnate an lo thlen a, hmalak zel dan tur leh harsatna chinfel dan turte an sawiho.
Navneet Mann chuan, Sethlun huam chhunga kawng laih hmabak awm chu ṭhál lehpeka thawh theih turin zangnadawmna dilna hmuh thar leh a hmun tihfel ngaite chu a rang lama bawhzui a ṭul thu a sawi a; leimin hlauhawmna laiahte ṭha taka lungrem siam tur leh Mizoram Polytechnic bula lungrem leh kawng siam chu April 2026-a zo hman turin contractor-te a hriattir.
Contractor-te chuan, Theiriat huam chhunga Mengpui hnar aṭanga T-Way Filling Station leh kawng chung lei minna thlenga lungrem (retaining wall) siam leh blacktoping turah GSB an dah ṭan a, April 2026 chhunga an zawh tur thu an sawi.
Zobawk huam chhunga ram neitute'n zangnadawmna an hmuh loh vang leh harsatna dang vanga kawng laih an remtih lohna ṭhenkhat chu an harsatna chinfel mek a nih avangin, a rang lama hna ṭan tura tih a ni a; zangnadawmna la tawh in pathum ṭhiah tur chu kar lehah a neitute'n ṭhiat ṭanin, an ṭhiah zawhah hna thawh ṭan ni se, an ti.
Zobawka retaining wall siam tawh a khîk vanga siamṭhat ngai chu a bul kawng luan leh tui luankawr siamte March 2026 chhunga khawih tura tih a ni a, chumi zawhah hmalak zui dan tur ngaihtuah ho ni se, an ti. Ram buai hrang hrang chinfel dan tur leh ram teh ṭhat tur te, kawng laih, kawng luan, lungrem siam, tui luankawr siam, culvert siam leh hna hrang hrang thawh tur ruahmante chu chak taka bawhzui ni se an ti bawk.
Lunglei Bawrhsap hian Ningani vek khan UDPA department hmalaknaa sikul bungrua inthleng rûnpui, Swap & Save campaign kalpui mek leh, Lunglei Chanmari AWC leh Hrangchalkawn UPHC te a tlawh bawk a ni.