Kan hmalaknain rah ṭha a chhuah ṭan - Health Minister

Health & Family Welfare minister Lalrinpuii chuan March 14, Inrinni khan Tuikual North Health Clinic a tlawh a; sorkar hmalaknain rah ṭha a chhuah ṭan thu a sawi.

Lalrinpuii chuan, Tuikual North chu veng lian tak ni mah se, hun rei tak chhunga an dil health sub-centre an hmuh theih loh thu a sawi a, "In bialtu MLA-in a vei em em a, kan remchan hmasakah kan pe ta che u a, a sakna tur sum pawh kan pe thuai dawn che u a, chumi en tur chuan ka lo kal a ni," a ti.

ZPM sorkarin kum hnih hmel a hmu tawh tih sawiin Lalrinpuii chuan, "Kan hmalaknate pawhin rah ṭha a chhuah ṭan a, kan hnathawh leh hmachhawp te pawh hmuh theihin a awm chho ṭan a, kan term kan hman zawh meuh chuan Mizoram hian hmasawnna kawng tam takah a hmu dawn a ni," a ti a; sorkarin hriselna lam a ngaih pawimawh thu a sawi.

Bialtu MLA Lalnghing­lova Hmar, minister of state pawhin thu sawiin, "Kan bialte harsatna min hriatpuia kan dilna min tih hlawhtlinsaktu Health Minister chungah thinlung takin lawmthu kan sawi a, building sakna tur sum min ruahmansak leh zel tur hi kan lawmna tizualtu a ni," a ti.

He hun hi Tuikual North Local Council chairman F Kamhmunga'n a kaihruai a, LC, YMA, MHIP leh MUP aiawhte an tel a ni.