KHAWTHLIR

Thisen pe

March 14, Inrinni khan Ramhlun Vengthlang Presbyterian Kohhran chuan an kohhran silver jubilee puala thisen pek rûnpui huaihawtin, Synod Hospital tan thisen unit 58 an pe a, petute mipa 53 leh hmeichhia panga an ni. Zotlang Branch YMA pawhin an branch kum 40 tlin pualin Synod Hospital tan thisen unit 43 an pe a, petute mipa 37 leh hmeichhia paruk an ni.

Pro. pastor la lut

Baptist Church of Mizoram-in probationary pastor atana a lak thar, probationary hun hmang ṭan turte chu nimin khan Lunglei Ramthar BCM biak-inah lak luhna (induction service) buatsaih a ni a; BCM general secretary Rev. Dr H Lalthlamuana'n a la lut. BCM probationary pastor lak luh tharte hi mi panga an ni.

Chanchin Ṭha Thlen Ni hmang

Mizoram Presbyterian Kohhran chuan nimin khan Chanchin Ṭha Thlen Ni an hmang. Chanchin Ṭha Thlen Ni hi tualchhung kohhran hrang hrangah hman a ni a, Synod aṭanga thupui thlan hmangin thuchah an ngaithla. Mizorama Pathian thu hril hmasa bera ngaih Rev. William Williams-a'n kum 1891-a Tlawng luia Kutbùl lui chhuah a thlen ni, March 15 chu Mizoram Synod-in Chanchin Ṭha Thlen Ni atan kum 2014 khan a hmang ṭan a ni.

Nautê tla hlum

Ruthi Lalbiakṭhamawii (2) d/o Israel Liana, Farkawn chu March 14, Inrinni khan an tukverh aṭangin a tla hlum. Thu dawn danin, Ruthi hi chhunah an tukverh aṭangin an kawm thlangah a tla a, damdawi-in panpui nghal ni mah se, a hliam tuar loin chawhnu dar 1:45-ah a thi a, nimin chhun khan vui a ni.

CYMA-ah nuai 10 pe

Home minister K Sapdanga chuan Assembly session-ah INC member C Ngunlianchunga zawhna ziaka chhangin, Central YMA-in Mizoram khua leh tui dik takte chhinchhiahna tura Village Profile Record a kalpuina atan cheng nuai 10 pek a nih thu a tarlang. HM tarlan danin, CYMA-in sum leh pai senso phuhrûkna atan Home department-a an dil angin, Finance department phalnain pawisa pek a ni.