Delhi leh Kolkata-ah Chapchàr Kût hmang; 'Mizona kan tilang ngam tur a ni' - Minister

Delhi-a Mizote chuan March 13, 2026 khan Chapchàr Kût an hmang a; Kolkata-a Mizote pawhin March 14, Inrinni khan Chapchàr Kût an hmang a, minister Dr Vanlalthlana'n a hmanpui.

Calcutta Mizo Welfare Association (CMWA) huaihawta Mizoram House, Salt Lake-a Chapchàr Kût hmannaah Dr Vanlalthlana chuan, Chapchar Kût ṭobul chu hlawhchhamte hnem duhna aṭanga chhuak a nih thu sawiin, "Zo nun ze mawi lantir a, dinhmun chhe zawkte tana ke pên zel a ṭul a, ram pawna kan awm hian chhuang takin kan Mizona kan tilang ngam ṭhin tur a ni," a ti a; Mizo danglam bikna chu hnam dang hmuha thiam taka pho chhuak ṭhin turin Kût hmangtute a chah.

Dr Vanlalthlana chuan, Mizoram tan Kolkata chu kawtchhuah ber a nih thu sawiin, "Kolkata-a Mizo fa cheng leh khawsate chu Zo nun ze mawi lan chhuahtir kawnga hun rei tawh tak aṭanga tha lo thawh tawh ṭhin an ni. Dam lo leh mitthi ruang buaipui bakah harsatna tâwk hrang hrangte tlawmngaih chhuahin an ṭanpui ṭhin a, Mizo hnam tana malsawmna kan lo nih tawh ṭhinna hi i vawng nung zel ang u," a ti.

Kolkata-a Chapchar Kût hman hi CMWA president C Lalmuanzuala'n a kaihruai a, Mizoram House joint resident commissioner Zoremthara Ralte pawhin thu a sawi.

Kolkata-ah Mizo sang chuang an awm mek a, chung zinga mi 703 chu CMWA-ah an inziak lut a ni.

Delhi-ah chuan Art & Culture department leh Delhi Mizoram House huaihawtin Chapchar Kût hman a ni a; additional controller general of accounts Zothankhuma chu kût pa niin, Delhi Mizoram House resident commissioner Shweta Chauhan chu kût thlengtu a ni.

Delhi Mizo Zirlai Pawlin hnam làm chi hrang hrang an entir a; additional resident commissioner Alexander V Chongthu pawhin thu a sawi. Rajya Sabha MP K Vanlalvena, MADC chief executive member M Laikhaw leh mi pawimawh dangte'n an chhim bawk.