CYMA-in Chapchàr Kûtah ram páwna Mizote hun an hmanpui

Central YMA chuan Chapchàr Kût hmang tura Mizoram páwn aṭanga an sawm Zo hnahthlakte chu March 13, 2026 zan khan Central YMA Hall hun an hmanpui a, pawl eng emaw zat aiawh an tel.

He hunah hian Mizo Society of America, Mizo Society of Australia, Myanmar Mizo Organization leh China Community of Indiana te, Myanmar aṭangin Central Mizo Ṭhalai Pawl, Varpui Youth Association, Letpanchaung Youth Association, Mizo Welfare Organization, Segyi Youth Association, Tahan Mizo Ṭhalai Pawl, Tuingo Youth Association leh Varpui Youth Association te, Tripura aṭangin Hrangkhawl Youth Association, Rengzo Joint YMA (Darlong) leh Tripura Group YMA te, Manipur aṭangin Group YMA te an tel a ni.

CYMA president R Lalngheta chuan, YMA-in Zo hnam hrang hrang zingah en hran an nei lo tih sawiin, unau vek an nih avangin inpumkhat tlat tur leh ṭangho tlat turin a sáwm a, "Raltlan zingah fel lo deuh leh ṭha lo deuh an awm a, a ṭul chuan kan hau zel ang; a felte erawh inthlahrun tur a ni lo,” a ti.