Ruihhlo donaah Mizoram sorkarin tlawmngai pawlte thâ tih chak a tum

Home minister K Sapdanga chuan March 14, Inrinni khan Siaha a tlawh a; ruihhlo do kaihhnawih sorkar hotu te, MJA, tlawmngai pawl leh khawtlang hruaitute nen DC conference hall-a an inkawmnaah, ruihhlo donaa thawk tlawmngai pawlte thâ sorkarin tihchak a tum thu a sawi.

Minister K Sapdanga chuan, ruihhlo dotute thusawi ngaithla tura kal a nih thu sawiin, Mizorama ruihhlo luhkate uluk taka vên a nih avangin hmun dangah hlet a chhuah hlauhthawn thuah ramri hrûl district tlawh kual a, an thu leh hla ngaihthla paha sawihona neih ṭhaa an hriat vanga tlawh a nih thu a sawi a ni.

Tlawmngai pawlte thâ tihchak sorkarin a tum thu sawiin K Sapdanga chuan, "Tlawmngai pawl hrang hrangte thawhrimna kan hriatpui a, tlawmngai pawl tha thawh tawhna zawng zawngah lawmthu ka sawi. An thâ aia chak a awm loh avangin an phûrna tichak zawnga hmalakna khawp sum leh pai leh facility a awm tura ngaih a ni a, district administration kaltlangin ṭul leh mamawh thlen ni se, anni'n Home department-ah an lo thehlut zel dawn a ni," a ti.

Home Minister chuan, tlawmngai pawl leh sorkar hnathawkte chu mipui rawngbawltute ve ve an nih thu sawiin, "Lungrual taka thawhho thiam a ṭul a, kan tu leh fate seilenna tlâk khaw nuam leh changkang din tumin tun aia ṭang lehzuala hma kan lak a ṭul. Sorkar leh tlawmngai pawlin ruihhlo do kawngah chak taka hma an lak avangin ruihhlo man a to a, a ti ṭhinte pawhin an nghei phah," a ti a; sorkar leh tlawmngaite'n ruihhlo an do avangin khawpui chhungah zana vak rawlai an tlem phah a, a ralmuan phah thu a sawi.

Ruihhlo ngaite chu damlo enkawla enkawl an nihin an damlo der nasa ṭhin tih sawiin K Sapdanga chuan, "Hlahthlem bik chi an niin a lang lo. Covid-19 lên laiin ruihhlo a lo lut lo a, ruihhlo ngai, an nghei vanga thi an tam phah chuang tlat lo. Rilru lama a thawh tel vang ni maiin a hriat a, chuvangin, a dìm zawng ni loa enkawl a ngamawm a nih hi kan ti," a ti.

Inkawmnaah hian Siaha district bawrhsap VL Hruaizela Khiangte-in Siaha district-a ruihhlo lut ṭhin chu ram dang (Myanmar) ni loin, Mizoram chhung district dang aṭanga lut a nih tlangpui thu leh, luhka pawimawh hmun paliah endikna hmun siam a nih thu a sawi.

Siaha SP Manjeet Singh Shankla pawhin Siaha district police-te'n ruihhlo donaa hma an lak dan a sawifiah a; Excise & Narcotics assistant commissioner TC Lalropuia'n an hnathawhte a sawi bakah, tlawmngai pawl aiawhte'n an hmalak dan an sawi bawk.