International Day of Action for Rivers hmang

March 14, Inrinni khan Irrigation & Water Resources department auditorium-ah International Day of Action for Rivers vawi 29-na hman a ni a, IWR minister PC Vanlalruata'n a hmanpui. Kumina thupui chu ‘Protect rivers, protect people’ tih a ni.

IWR Minister chuan, lui tui humhalh ṭhat lohin mipuiah nghawng a neih nasat thu a sawi a, "Mizoramah lui tui fim a awm avangin Mizo mipui kan vannei. Hetihlai hian, lui lian ṭha a awm loh avangin tuihna siamtu lui tê zawkte humhalh a ngai. Lui tui hi nunna hnár a ni a, humhalh a nih loh chuan ṭhangthar awm zel turte’n tui in tur an nei dawn lo," a ti.

Sorkarin lui humhalh nan hma a lak mek thu sawiin PC Vanlalruata chuan, "Mizo lo neih dan, tlang ram loneih (shifting cultivation) aia hrisel leh a chhehvel tichhe lo zawka loneitute’n lo an neih theih nan sorkar chuan tung cultivation leh permanent farming a kalpui mek," a ti a; lui tui veina nen hma la a, mi dangte zirtir zel turin kal khawmte a chah.

Khualzahawm H Ginzalal, adviser to CM pawhin thu sawiin, lui leh luia nungchate humhalh turin lui tibawlhhlawhtu lian ber zinga mi plastic waste danna atan trapping system siam ṭul thu a sawi a, "Plastic bawlhhlawh sawngbawlna lama tui turin mipui chawh phûr an ngai. Shifting cultivation tihtlem a, a theih phei chuan tihtawp a, permanent farming nasa zawka kalpui a pawimawh," a ti a; ramngaw tichereu lo zawnga economic link road laih dan tur kaihhruaina fel tak neih a ṭul thu a sawi.

International Day of Action for Rivers hi kum 1997 khan Brazil-a ram hrang hrangte intawhkhawmnaah lui humhalh a nih theih nana kum tina hman tura rel a ni a, March 14, 1998 aṭangin kum tin hman niin, Mizoramah chuan kum 2025-ah hman ṭan a ni.

Action for Rivers Day hmanna inkhawm hi IWR secretary Lalrothanga'n a kaihruai a; MZU Department of Geography and Resource Management Prof. Benjamin L Saitluanga leh Indian Institute of Engineers, Mizoram State Centre chairman H Lalchhuanvela ten Day thupui an sawi. Day puala intihsiakna hrang hrang lawmman sem a ni bawk.