CM-in Mizo mipuite tisa leh thlaraua Malsawmna dawng turin a duhsak

Chief minister Lal Thanhawl-a chuan, Krismas leh kum thar lo thleng tur chu Zo hnahthlak zawng zawngte'n tisa leh thlaraua malsawmna an dawnna hun ni thei se a duh thu a sawi.

Chief Minister hian nimin khan thuthar thehdarhtute hmaah Krismas leh kum thar thuchah sawiin, "Krismas lo thleng tur atan Kristian zawng zawngte kan inpuahchah mek a. Lal Isua lo piang tur hi kan hmuah dan inang vek lo mah se, ro thil dang ngaihtuah loin, kan rethei emaw, hausa emaw, Lal Isua'n engkim a ti thei tih hriain he hun lo thleng turah hian a lam i hawi ang u," a ti.

Khawvelah lal tam tak piang tawh mah se, Lal Isua ang an la piang lo tih sawiin Lal Thanhawla chuan, "Khawvelah hian Pathian nung an la piang ngai lo. Lal Isua chu a pian hma daih aṭangin a pian tur thu zawlneite'n an hrilh lâwk tawh a, a thih tur thlengin sawi lâwk vek a ni," a ti a; Isua chu a thih hnuah lal dang ang ni loin a ram a zau zel tih a sawi.

Zo hnahthlakte chu an awmna hmun apianga Isua lam hawi tura chahin CM Hawla chuan, "Kan awmna hmun ṭheuhah hunpui lo thleng tur hi hlim leh lawm takin, kan nihna ang angin i hmang ang u. Tisa leh thlarau lama malsawmna kan dawn tam ber kum a nih theihna atan Zo hnahthlak zawng zawngte duhsakna ka hlan a ni," a ti a; Zo hnahthlakte chu Krismas leh kum thar chibai a bûk a ni.

Chief Minister chuan, Krismas thleng turah damloh vanga natna tuar mek te, nun kawng ṭha zawk an neih theihna tura jail leh home hrang hranga awm mek te, chanchin ṭha hrila hmun khawhar, hrehawm leh harsatna tuar mekte rilruah an chám reng tih sawiin, "Krismas hlimawm taka in hman theihna atan Chandamtu Lal Isua'n awmpui che u rawh se," a ti a; thihna hlim hnuaia ṭhute tan ênna ropui a thlen thu a sawi.

Rinawmna, dikna, takna leh taimakna nen, khawtlang leh kohhran nun siamṭhain, ei leh bar leh sum leh paia intodelh a, malsawmna tam tak tawng buain, nau piang lal leh chhandamtu chawimawi turin Chief Minister Lal Thanhawla chuan Zo hnahthlak mipuite a sáwm a ni.