NIAS-a Mizo zirlai 32-te chungchangah MYC-in inrawlhna an nei lo niin an sawi

Mizoram Youth Commission (MYC) chuan under secretary Lalsawm-zual-a hmingin thuchhuah an siam a, Nalanda Institute of Advanced Studies (NIAS), Kolkata-a Mizo zirlai 32-te beidawnga Mizo-rama an haw chung-chang an sawifiah a; NIAS, Kol-kata-a zir tura Mizo ṭhalaite tirhnaah MYC-in inrawlhna a nei lo niin an tarlang.

MYC thuchhuah chuan, Vanglaini chan-chinbu December 22, 2016-a chhuakah, MYC tirha NIAS, Kolkata-a Bachelor of Hotel Management (BHM) zirlai Mizo 32-te beidawnga an lo haw thu tarlan chu hriat sual palh niin a tarlang a, "NIAS-a zirlai tirh chungchanga advertisement chhuah, interview leh zirlaite senso buaipuinaah MYC hian engahmah inrawlhna a nei lo," a ti.

MYC chuan, NIAS-a BHM zirlai 32-te senso cheng nuai 128.20 chu MYC pawisa a ni lo a, MYC-in sum sen a nei lo nia sawiin, "Hemi chung-changah hian MYC-in mawhphurhna a nei lo," an ti a; zirlaite'n harsatna an tawh tâkah chuan MYC-in mawhphurhna a nei lo chungin a theih chin chinah zirlaite an buaipui ve ṭhin niin an tarlang.

Hetih lai hian, August 29, 2014-a sorkar thu-chhuah (IPR press release)-ah chuan "MYC bultuma NIAS-a zir tur thlahna programme Pu John Siamkunga'n a hmanpui" tih thupui hmangin MYC bultuma NIAS, Kolkata-a BHM zir tur Mizo zirlai 31 thlahna hun, DRDA Conference Hall-ah hman a nih thu tarlan a ni.

August 29, 2014-a sorkar thuchhuahah chuan, NIAS, Kolkata-a BHM zir tur Mizo zirlaite chu Mizoram Labour & Other Construction Workers’ Welfare Board kaltlanga MYC-in zirna tur ṭhalaite tan a zawnsak a nih thu John Siamkunga'n a sawi bakah, zir turte fuihna thu a sawi. MYC chairman T Sangkunga pawhin thu a sawi bawk.

August 29, 2014-a sorkar thuchhuah hi Vanglaini chanchinbuah pawh August 30, 2014-ah tihchhuah a ni.