Aizawlah free wifi pek chhuah ṭan a ni

India ramah free wifi a lar hle tih sawiin, Lalhmingthanga chuan, "A ti hmasa kan ni lo a, a ti hnuhnung pawh kan ni lo," a ti a; India ram chhung khawpui hrang hrangah free wifi an pek nual tawh thu leh, ram hrang hrangah an ti nasa a, free wifi chu khualzinte leh zirlaite tan a ṭangkai lehzual thu a sawi.

PC Lalhmingthanga chuan, free wifi atan sum senso a sang viau chungin mipui leh zirlaite'n an
ṭangkaipui dawn avangin a ṭha hle thoa an ngaih thu a sawi a, "Kan sum sen hi a thlâwn dawn lo. A ṭangkaina kan hmuh avangin lawm takin kan pe chhuak a ni," a ti.

AMC Mayor chuan, mipui tana ṭangkai tur pek zel an duh tih sawiin, "Thil tam tak la ti thei lo mah ila, mipui tana
ṭangkai tur pek tumin kan inbuatsaih zel. Aizawl ṭha leh mawi zawk siam kan tum a ni," a ti. Kawngpui laih khuar a, motor parking atana siam a, a chungah kawngpui kaltir tumin hma an la a, a hmasa ber atan Chanmari-ah siam an tum thu te, Aizawlah solar street light 1,087 vuah an tum thu te, pedestrian footpath an ngaih pawimawh thu te, kum 2018-ah chuan Tuirial kama bawlhhlawh paihna tihtawp an tum thute a sawi bawk.

Free wifi hi internet service provider Nextcomm-in an pek chhuah tur niin, Aizawla college pasarihte behchhana bun phawt a ni dawn a; chung-te chu - GAC, Johnson College, Aizawl West College, T Romana College, Hrangbana College, Aizawl North College leh J Thankima College-te a ni. Tunah chuan GAC-a an bun chiah a hman theih rih dawn a, college dang-a mite chu a tahtawlin hman theiha tih tum a ni.

Nextcomm aiawh Isaac C Lalzarliana'n tech-nical report an pek dan-in, free wifi bunna (hotspot) hi optical fibre-in an thlunzawm a, hrui a chah palha hman lai-lâwk (back-up) turin radio wireless an hmang bawk. Free wifi bik vil turin team an siam a, mi pa-sarih an awm. Internet wifi an pek chhuah chu a ṭha
tâwk hle turah an ngai.