ZNP-in MYC Chairman báng turin an phût

Zoram Nationalist Party (ZNP) chuan, Mizoram Youth Commission (MYC) chairman T Sangkunga, MLA chu Nalanda Institute of Advanced Studies (NIAS), Kolkata-a Mizo zirlaite tirh leh an hlawhchhamnaa mawhphurhtuah an puh a, MYC chu báng turin an phût.

ZNP chuan, NIAS, Kolkata-a MYC tirah Bachelor of Hotel Management (BHM) zir tura kal Mizo zirlai 32-te beidawnga an lo haw chu vanduaithlak an tih thu sawiin, "He inbumna lung-chhiatthlak tak maia mawhphurtu MYC Chairman hi a hna chelh zui zel tlakah kan ngai lo a, Chairman a nihna aṭanga báng turin kan phût a ni," an ti.

NIAS, Kolkata-a BHM zir tura intirhna chu inbumna tenawm tak nia sawiin, ZNP chuan, "Mawhphurtu chhuichhuak ngei turin Mizoram sorkar kan ngen a, a mawhphurtu chunga action la ngei turin kan duh," an ti a; zirlai harsatna tâwkte’n an harsatna Chief Minister leh a changtu minister hnena an thlen chung pawha ngaihsak an hlawh lo chu pawi an tih thu an sawi.

ZNP chuan, zirlai 32-te’n kum thum dawn hun an séng thlawn ta mai hi pawi an tih thu leh an lainat thu an sawi a; zirlaite hnena zángnadawmna pe ngei turin Mizoram sorkar an phût bawk.