CM leh NCC hotu an inkâwm

India hmarchhaka NCC Directorate-a director general Maj.Gen. RGR Tiwari chuan nimin khan chief minister Lal Thanhawla a pisaah a kâwm a, Mizorama National cadet Corps (NCC) hmalakna leh thil ṭulte a sawipui.

Maj.Gen. RGR Tiwari chuan, Mizo NCC cadet-te chu state dangte cadet aia an ṭhat thu te, infiamna lam an theih thute leh kawng engkima an fakawm thute a sawi a, "NCC band party phei chu Delhi tlanga an inlan
ṭumin mipui leh hotu liante'n dangdai an ti a, an hlut viau ṭhin," a ti.

Mizoram sorkar aṭanga NCC sum an hmuh tur an la hmuh lo vanga harsatna an tawh chungchang NCC hotuin a sawi chungchangah, Chief Minister chuan, Finance department hotute tihfel vat turin a hrilh nghal a ni.

Turial Airfield hmuna NCC Academy leh Air Wing Headquarters-te dinna atan leh Lungleia NCC Battalion dinna tur chungchanga Chief Minister zawhna chhangin, Maj.Gen. Tiwari chuan, "Tuiriala kan hmunhma mamawh tur hi joint survey neih a ṭul a ni," a ti a; Lungleia NCC Battalion dinna atan lehkha pawimawhte chu Ministry of Defence-ah thehluh a nih tawh thu a sawi.

NCC Director General hi Silchar Region group commander Brig. Chatterjee, Wing.Cdr. K Goel leh 1st Mizo Air Squadron NCC hotute'n an ṭawiawm a ni.