2015 aiin 2016-ah 30%-in borual a bawlhhlawh

Mizoram Pollution Control Board (MPCB) chuan thuchhuah siamin, kum 2016 kumtluanin Mizorama boruak bawlh-hlawh dân zir chianna uluk takin an kalpui tih an tarlang a; Aizawlah kum 2015 aiin 2016-ah bawlhhlawh nâwi lêng vêl chawhrualin 30% velin a pung tih an sawi.

MPCB hian boruak bawlhhlawh dân tehna hmun, air monitoring station (AMS) chu Aizawl, Lunglei, Kolasib leh Champhaia hmun 11-ah an bun. Aizawl district-ah chuan Dawrpui, Sikulpuikawn, Bawngkawn, Laipuitlang leh Lêngpui Airport-ah an bun a; Lunglei, Kolasib leh Champhai district-ah chuan hmun pahnih
ṭheuhah an bun bawk.

AMS 11 aṭang hian boruak bawlhhlawh dân chawlhkâr khatah ni hnih, ṭum khatah darkar 24 zel khawl hmangin an endik ṭhin a; boruak bawlhhlawh dan chu a tibawlhhlawhtu tehfung chi thum hmangin an endik ṭhin a ni.

MPCB chuan, AMS 11 aṭanga kumtluana result chawhruala a lan dânin, Mizoram boruak, a bikin Aizawlah kum hmasa aiin boruak a bawlhhlawh zual tih tarlangin, "Boruak tibawlhhlawhtu, bawlhhlawh nâwi hrang hrang léng vêl, mihringte’na hîp luh tham leka tê leh hriselna lama harsatna chi hrang hrang min thlen theitu Particulate Matter (PM10) chu Aizawl khawpuiah a sang chak hle," an ti.

Tarlan danin, mi-hringte tâna him chin sor-karin a bithliah chu chawhrualin 60 µg/m3 (micro gram per metre cube) a nih laiin, Aizawla boruak bawlhhlawh tehna hmun pathum - Dâwrpui, Sikulpuikâwn leh Bawngkawnahte chuan a him chin bithliah a pèl vek. Sikulpuikâwnah chawhrualin PM10 hi 87µg/m3 a ni a, Bawngkawnah 65µg/m3 leh Dawrpuiah 79µg/m3 a ni. Laipuitlang, Lêngpui Airport leh district dangah chuan PM10 chu him chin bithliah hnuai lamah a awm vek thung.

Boruak tibawlhhlawhtu dang endik zinga mi, Sulphur Dioxide leh Nitrogen Dioxide-te erawh chu an la sang lo. Sulphur Dioxide chu kumtluanin tihtham a awm lo a, Nitrogen Dioxide chu a sáng tial tial a, Dawrpuiah a sâng chak zual a ni.