END-in golden jubilee an lawm ṭan

Excise & Narcotics department (END) chuan nimin khan an department golden jubilee an lawm ṭan a, END minster Lalnghinglova Hmar-in hmanpuiin, END Commissionerate-ah jubilee monument a hawng. Jubilee hi district dang ṭhenkhatah pawm lawm a ni.

END hi March 15, 1976-ah din niin, a tirah chuan Excise & Taxation department tih a ni a, a hnuah eng emaw chen Excise department tih a nih hnuah kum 1996 aṭangin Excise & Narcotics department tih a ni.

Minister Lalnghinglova Hmar chuan, END chu mipuiin an phûrpui thu sawiin, "Kan beisei phâk bâkin mipuiin min thlâwp a, kan hotute pawhin min duhsak a, kan thawhhona a ṭha tih a lanna a ni. Department-a ka thawhpuite ka fak a, theihtawp chhuahin kan bei chhunzawm zel tur a ni," a ti.

Bible-ah kum 50-na chu jubilee kum tih a nih thu sawiin Minister chuan, "Jubilee kumah chuan inngaihdamna te, zalenna kumah te an hmang ṭhin. Kan jubilee kumah hian keini pawh kan inngaihdam a, thawhhona ṭha lehzual a awm theih nan kan insiamṭhatna hun tur a ni," a ti a; END golden jubilee chu mi tin tan bâwiha an tànna aṭanga zalenna thlentu ni se a duh thu a sawi.

Lalnghinglova Hmar chuan, mihring kum 50 mi chu vanglai hun hmang mek a nih rualin, tawnhriat ṭha tak nei tawh a nih thu a sawi a, "Kan chak lai leh kan fin vanglai tak a ni a, kum 50 tling tawh department chu a fing tawh tur a ni. Kan hna bul ber chu ruihhlo do a ni a, kan do lamah kan ṭan a thiang lo. Jubilee kum a nih angin i ṭang thar ang u," a ti.

END golden jubilee lawmna hawn inkhawm hi END commissioner Z Lalhmangaiha'n a kaihruai a, END-a thawk mi ṭhahnem tak an tel.

Golden jubilee pual hian nimin tlai khan END Commissioner hoin golden jubilee mei dêt a ni a; jubilee tun kar chhung zawng lawm tur niin, March 18-ah Aizawl leh district dangah thisen pek rûnpui an huaihawt dawn a ni.