Health Minister-in MSACS office thar a hawng; AIDS do kawnga hmalakpui turin kohhrante a sawm

Health & Family Welfare minister Lalrinpuii chuan nimin khan Mizoram New Capital Complex (MINECO)-a Mizoram State AIDS Contral Society (MSACS) office building sak thar 'State Resource Centre for HIV/AIDS' a hawng a; HIV/AIDS do kawngah hmalakpui turin kohhrante a sawm.

Lalrinpuii chuan, Mizoram chu India ramah HIV kai tamna a ni a, minister nihna ang pawhin zahthlak tih châng a neih ṭhin thu sawiin, "Tunah hian theihtawpin a tlakhniam theihna turin hmalak a ni a, HIV vanga thi zat rate chu ART an lak ṭhat avangin a tlem thung. HIV/AIDS hi fimkhur chuan kai darh hleihtheih loh, fimkhur loh erawh chuan darh hluai thei a ni. Kohhran hruaitute hi Mizoramah chuan kan ngaihsan ber an ni. Kohhranah hian mitin kan in attached a, kohhran thu chu Pathian thu ang tak takin kan ngai a, chuvang chuan hma min lakpui turin kohhrante hi ka sawm tak meuh meuh a ni," a ti.

HIV/AIDS darh zel tur ven nan leh a kai tawhten enkawlna ṭha an dawn theih nan Kohhrante hian innei thar turte hnenah HIV an kai leh kai loh finfiahna certificate phût se a ṭhat a rin thu Minister chuan a sawi a, "Hei hian nasa takin min puih theih ka ring," a ti a; kum 20 chhungin MSACS chu vawi nga an insawn kual tawh thu leh awmna mumal nei mang loa an awm chângte pawh a awm thu sawiin, mahni puala building an nei thei ta chu a lawmpui thu a sawi.

MSACS office hawnna inkhawm hi Health secretary K Lalrinzuali'n a kaihruai a; MSACS project director Dr Jane R Ralte chuan Health Minister hnenah hian 'Women Icon Award' a dawn avanga lawmpuina thilpek a hlan bakah, MSACS Project Director lo ni tawh ṭhinte hnenah chawimawina thilpek a hlan a ni.

State Resource Centre for HIV/AIDS tan hian MINECO Management Committee chuan July 29, 2020 khan ram sq.m 445.23-a zau a pe a; Ministry of Development of North Eastern Region aṭanga hmuh Rs 4,00,00,000 sengin office building hi sak a ni.