Mitmei ven tur a tam lutuk chuan hma a lak tak tak theih loh - Supply Minister

Food, Civil Supplies & Consumer Affairs (FCSCA) department chuan nimin khan ‘World Consumer Rights Day 2026 (March 15) pualin Dawrpui Multipurpose Centre-ah programme an buatsaih a; FCSCA minister B Lalchhanlova'n hmanpuiin, consumer-te dikna chanvo venhim kawngah mitmei ven tur a tam lutuk chuan hma a lak tak tak theih loh tih a sawi.

B Lalchhanzova chuan, World Consumer Rights Day an hman chhan chu consumer-te dikna chanvo venhim kawnga midangte tana thil ṭha tih an duh vang a nih thu a sawi a, "Thil ṭha kan tih tak tak dawn chuan mi dangte mitmei ven hi chuan a tih tak tak theih loh. Vawiinah sumdawng pawl hrang hrang kan kal khawm a, tumah in haw tur kan awm lo a, thil ṭha kan sawi hian tute emaw tan chuan a na deuh a ni maithei, va tih nat kha kan tum a ni lo. A mawi hawih chin chauha thil kan tih chuan reform a thlen theih loh a ni. He consumer zin kawngah hian mitmei ven kan tih nat lutuk chuan engang pawhin hma la mah ila a nihna tur tak kha a thleng chuang lo ang," a ti.

Mipuite hian bungrua, ei leh in leh service hrang hrang an leina kawngah dikna chanvo an neih thu leh an chanvo an hriatchian a pawimawh thu sawiin Minister chuan, "Dawr kai, sumdawng mite, pawl leh sorkar department hrang hrangte chu mipui tana dawr nuam leh rintlak an nih a pawimawh a, mipuite pawhin thil kan lei dawnin kan thil lei tum kan belhchian a pawimawh. Mitinte hian rinawm takin kan hna ṭheuh kan thawh a, mi rintlak kan nih chuan Mizoram nuam leh changkang kan siam dawn a ni," a ti a; buhfai bûk dik leh buhfai bo thlau tur an ven avangte leh subsidy ennawn a nih avangtein sorkar sum cheng eng emaw zat an hum tawh thu a sawi.

FCSCA secretary Teresy Vanlalhruaii pawhin thu sawiin, mipuiten thil lei chungchangah harsatna an tawh chuan Consumer Rights Commission hnenah an harsatna an thlen theih thu a sawi a, "Mipui chanvo humhalh nan sorkar chuan CPGRAMS leh Mipui Aw-te a siam a, FCSCA department chu hetiang harsatna chungchangah helpline number 1967-ah biak theih reng kan ni," a ti.

World Consumer Rights Day hmanna inkhawmah hian State Consumer Protection Council & Subject Matter Expert, Mizoram member Prof. Laldinliana Varte chuan kumin day thupui ‘Safe Products, Confident Consumers’ chungchang a sawifiah a; Mizoram Consumers’ Union (MCU), Centre for Consumer Education leh Mizoram Law College aiawhten consumer rights awareness lama hma an lak dante an tarlan bakah Consumer Protection Act 2019, LPG home delivery, sumo leh bus (public transport) rate leh thil pawimawh dangte inhrilhfiah a ni.

World Consumer Rights Day, 2026 pual hian district hrang hrangah pawh hun hman a ni.