Loneitute hnena pek tur tractor 25 vailiam

Agriculture & Farmers' Welfare minister PC Vanlalruata chuan nimin khan Zonun Enterprise, Silaimual, Melthum aṭangin Custom Hiring Centre hnuaiah Group of Farmers leh mimal parukte hman tur tractor 25 leh hmanrua a vailiam. Minister chuan, Mizoram chhunga buhfai thar lei a nih theih nan sorkarin policy mumal tak nei turin chak takin hmalakna a kalpui mek tih a sawi.

PC Vanlalruata chuan, sorkarin leilehna hmanraw tam zawk loneitute'n an neih theih nan a theih angin hma a la zel tih a sawi a, "Kumin Annual Action Plan-ah pawh Farm Mechanization atan sum tam zawk ruahman a ni a, buhhum lei chungchangah harsatna a awm avangin buhhum lei tawh loa Mizoram chhunga buhfai thar lei a nih theih nan sorkarin policy mumal tak nei turin hmalakna chak takin a kalpui mek," a ti.

Oil seed tam zawk thar chhuah a nih theih nan leilet neitute chu nasa zawka hma la a, sorkar laipuiin ruahmanna a siamte hmang ṭangkai tur leh khawl leh hmanraw dang an dawnte chu duat tak leh uluk taka enkawl a, ṭangkai taka hmang turin in PC Vanlalruata chuan a chah a, "Kumin hian tractor leh leilehna hmanrua 61 sem tura ruahman a ni," a ti a; he'ngte hi Sub-Mission on Agricultural Mechanization (SMAM) scheme hnuaia sum hmuh aṭanga pek chhuah tur a nih thu a sawi.

Sorkar thuchhuah tarlan danin, tractor pechhuak tur hian sorkar chuan approved dealer pali a nei a, tractor leh a hmanrua dawng tura thlan chhuah loneitu intelkhawmna (Group of Farmers)-te hian approved dealer-te aṭangin an tractor duh ber an thlang mai ṭhin a ni.