Minister-in mistiri inkhawmpui a hmanpui

Labour, Employment, Skill Development & Entrepreneurship (LESDE) minister Lalnghinglova Hmar chuan nimin khan Synod Conference Centre-ah Mizoram Mistiri Association (MMA) General Assembly vawi 11-na hmanpuiin, MMA Dan Bu, 2026 a tlangzarh a; kut hnathawktuten MBOCWWB hnuaia hamṭhatnate dawng thei se an duh thu a sawi.

Lalnghinglova Hmar chuan, Mizoram Building & Other Construction Workers Welfare Board (MBOCWWB) chu kut hnathawktute ta a nih thu a sawi a, "Board hnuaia hamṭhatna awm theite pawh tihpun a ni a, MBOCWWB chungchang hi mi tinin an hriat kan duh a, kut hnathawktute zawng zawngin he hamṭhatnate hi dawng thei se kan duh a ni," a ti a, MMA member-te chu an mahni bakah an hnuaia thawkte Board-ah hian ziaklut ṭheuh turin a sawm.

Mistiri-te chu chhungkaw tana eizawngtu, chhungkaw chawm tura hnathawk tak takte an nih thu sawiin Minister chuan, "Eizawnna hrang hrang awmte zingah hian hna zahawm tak a ni. MMA hi Mizo hnam dam khawchhuah nan a hlu a, hnam dang mistiri-ten hnathawkin min rawn luhchilh a, chutah chuan keini'n kan kut thiamna hmangin ṭan kan lo khawh a pawimawh a, kan hnam tan ṭhahnem kan ngaih a pawimawh hle," a ti.

Mizoram Mistiri Association-ah hian branch 115 inziaklut tawhin, member 3,000 vel an awm mek a; Assembly-ah hian um 2024 Assembly leh 2026 Assembly inkara member thi mi 39 te sunna hun hman niin, chawhnu lamah rorel inkhawm leh kum 2026-28 atana hruaitu thar thlanna neih a ni.