Minister of State paliin leimin chhan dan tur leh kawng zauh dan tur an enfiah

Nimin zing khan minister of state pali F Rodingliana, B Lalchhanzova, Prof. Lalnilawma leh Lalnghinglova Hmar chuan Dawrpui Venga Assam Rifles Biak-In bula leimin chhan dan tur, hemi ruala kawngpui zauh theih dan tur official-te nen an enfiah.

F Rodingliana chuan Tuikual Veng pa ni ṭhin, Dawrpui Venga pem ta a nih angin a hmunhma a hriat chian thu sawiin, "Leimin hi a zauh belh chuan Aizawl kawngpui lûn ber tana buaina a thlen palh a hlauhawm. Leimin ven dan kan en rualin kawng zauh theih dan a inhawng tih kan hmu a, bawhzui ngei chi a ni ang," a ti.

Disaster Management & Rehabilitation minister Prof Lalnilawma chuan, "Kan Department hmalakna tur a nih rualin keini aia sum leh thawktu nei ṭha PWD lamah dah ni se," a ti a, kawngpui zauhna thlenga an tih theih chuan thil lawmawm tak a nih tur thu a sawi.

Aizawl East II bialtu B Lalchhanzova chuan leimin chu an bial Dawrpui Veng chhung a ni chungin, a leimin hian Aizawl West II biala Tuikual South khawtlang a tibuai hle tih sawiin, "Nikum lamah kan buai hle a, kuminah hian a siamṭhat hna bakah kawngpui zauh theih dan ngaihtuah ni se ṭha kan ti tlâng a ni," a ti.

Aizawl West II MLA Lalnghing-lova Hmar pawhin thu sawiin, "Nikumah Aizawl tlak lam traffic tibuai khawpin a min a, a chhehvela chengte hian an vei em em a, chuvangin vawiinah hian kan hotute phungbawmah sawmin department lama thawktute nen a hmunah kan enho a ni," a ti a, rah ṭha a chhuah ngei a beisei thu a sawi.

Minister-te hi Aizawl DC Lalhriatpuia, PWD chief engineer Robin Lalrinawma, official dangte leh khawtlang hruaitute'n an ṭawiawm.