Bawlhhlawh paih motor vailiam

Nimin khan UDPA minister K Sapdanga chuan Secretariat Complex open gym tual aṭangin Swachh Bharat Kosh (SBK) Trust kaltlanga lei bawlhlawh paih motor 12 a vai liam.

UDPA Minister chuan Swachh Bharat Kosh (SBK) Trust chu sorkar laipuiin kum 2014-ah a din a nih thu sawiin, "Swachh Bharat Mission hlawhtlinna tura duan a ni. He trust hi company lian leh bank-ten corporate social responsibility (CSR) kaltlang leh mimal ṭhahnem ngaiten faina leh thianghlimna kawng a sum an rawn thawh ve theihna tura tura duan a ni," a ti.

Swachh Bharat Kosh Trust hnuaia sum hmuhte chu faina leh thianghlimna kawnga hmasawnna atan te, bawlhhlawh sawngbawlna hmun mumal leh tha zawk siam nan te, vantlang inthiarna sak nan te, Awareness Campaign bakah faina lama hna thawktute thiamna tih punna tura training leh workshop neih nante hman ṭhin a nih thu K Sapdanga chuan a sawi.

Swachh Bharat Kosh Trust hnuaiah hian cheng vbc 1.68 dawn a ni a, hemi hmang hian bawlhhlawh phur lirthei 12 lei niin - Farkawn, Kawrthah, Ngopa, Phullen, W. Phaileng, Saitual, Mamit, Khawzawl, Hnahthial, Lengpui, N.Vanlaiphai leh SSO Office, Aizawl te pek an ni. Tegistration tih fel sa vek niin document pawimawhte pawh hlan nghal an ni a, motor-ah hian PA set (aurinna) leh GPS tracker dah vek a ni.

Heng garbage truck bakah hian a chunga tarlan khaw 12 a sanitation worker-te hman turin rain coat - 2, gloves (kutkawr) - pair 14, mask – 12, gumboot - pair 4, hunter boot - pair 2, kekawr - 6, lukhum - 2, t-shirt - 4 leh kawrlum - 2 ṭheuh pek tel an ni.