Hmasawnna hnathawh leh thawh tur Chief Minister kaihhruaiin sawiho

Nimin khan chief minister Lalduhoma kaihhruaiin, Mizoram Pro - Active Governance & Timely Implementation (Mi-PRAGATI) meeting vawi hnihna CMO conference hall-ah neih a ni.

Mi-PRAGATI hi state chhunga hmasawnna hnathawh lian zualte vil a, harsatna an tawhte chinfel dan dappuitu tur leh a ṭul anga department hrang hrang thawhhona tichak tura din a ni a, mipui tana rawngbawlna tam zawk, langtlang leh rang zawk kalpuina tur a ni.

Nimina ṭhutkhawmah hian Aizawl Western Side By-pass Road laih mek te, NHIDCL hmalakna te, PM SHRI scheme hmalakna te, PMJVK hmalaknate leh Railways hmalaknate thlirho a ni.

Ṭhutkhawma tarlan danin, Aizawl Western Side By-Pass sial hna 19.56% thawh a ni tawh. Kawngin a paltlang rama khawsa raltlante sawn dan tur te, mimal quarry neitute'n zangnadawmna an phût chungchang te, kawng laihin a nghawng huan thlai chánte zangnadawmna te, forest clearance leh leivûng paihna chungchanga harsatna awm mekte sawiho a ni a; Aizawl bawrhsap Lalhriatpuia'n Leivûng paihna hmunhma an endik tawh dan leh rawtna an neihte a tarlang.

Vairengte leh Aizawl inkar kawngpui thlúr li (four lane) ni tura siam mek chungchangah, ṭhutkhawm hmasaa sawi lan, electric power line sawn a nih tawh thu tarlan a ni. Harsatna dang an la tawhte chinfel dan tur sawiho a ni bawk. Kawngpui zauh mek hi km 90.110-a thui tur a ni a, chu'ng zinga km. 60.295 chu greenfield alignment tura duan a ni.

PMJVK hnuaiah Mizoramah project 104 pawm tawh a ni a, chu'ng zinga 84 chu thawh zawh tawh niin, thawh mek 18 a awm a, sanction beisei mek a awm nual bawk.

Sairang aṭanga Thenzawl thlenga rel kawng siam dan tur enfiah chungchangah, rel kawng kalna tur tihchian thawkhat a nih tawh thu Railways hotute chuan an sawi.

Ṭhutkhawmnaah hian PWD minister Vanlalhlana, EFCC minister Lalthansanga, Education minister Dr Vanlalthlana, Revenue minister B Lalchhanzova, Chief Secretary leh official dangte an tel a ni.