Aizawl West Outlet Project hawn a ni

UDPA minister K Sapdanga chuan nimin khan Aizawl West Outlet Project hna thawh ṭan tur a khuh hawng. Project hi Dinthar aṭanga Tuikual South inkara Tuikual lui siam rem leh a chunga lirthei tlan theihna tur kawng siamna tur a ni.

K Sapdanga chuan, khawtlang thawhhona ṭha tak avang leh mimal ṭhenkhat, an in ṭhiah ṭhen ngaite leh ram pek ngaite'n phal taka an pek avangin hna thawh ṭan a ni dawn ta tih a sawi a, "A lawmawm tak zet a ni. UDPA hmalakna hrang hrang lungphûm leh hna zawh tawh hawnte tun hnaiah kan ngah a, heng hna hrang hrang hlawhtlinna atan hian sorkai lai mai bakah, hun hmasa lama hruaitu hmasate'n hmathlir an lo neih ṭhat zarte a ni," a ti.

UDPA Minister chuan, project chu hun rei tawh tak aṭanga Aizawl West-II bialtu MLA Lalnghinglova Hmar, minister of state-in ṭhahnemngai taka a bawhzui vanga hlawhtling thei leh hna ṭan theih ta a nih thu a sawi bawk.

Bialtu MLA Lalnghinglova Hmar pawhin thu sawiin, Project atana sum neihin hna pumpui a daih dawn loh avangin kawng chu laklawh deuhin a tawp dawn tih a sawi a, "Chhunzawmna atan UDPA-in Storm Drain Project an neih nena ṭangkawpin, Dinthar aṭanga Tuikual 'A' Mual thleng tui luankawr siamin, a chungah motor tlan theihna tur siam a ni dawn," a ti.

Lalnghinglova chuan, a ngenna ngai pawimawha tihhlawhtlinsaktu UDPA Minster leh department official-te chungah a lawm thu sawiin, "Project atana ṭhahnemngai taka thawktu khawtlang hruaitu hrang hrangte hnenah pawh lawmthu ka sawi a ni," a ti a; khawtlang hmasawnna dah pawimawh hmasaa an ramte phal taka petu chhungkaw eng emaw zat zara hna thawh theih a nih thu a sawi.

Aizawl West Outlet Project hi SASCI sum hmanga thawh tur a ni a, sum sen tur zat chu vbc 30.96 a ni. Project management consultant chu ARDECO Design Build a ni a, contractor pahnih Zothan Consultancy Services leh Studio Hamlet ten an thawk ang. RCC hmangin lui siam rem a ni dawn a, lui chungah metre 4-a zau kawng leh metre 1.5-a zau kea kalna (footpath) siam tur a ni a, km 1.68-a thui a ni.

Kawng hi Dinthar YMA ram hrûlah inṭanin, Tuikual lui a zawh chho dawn a, Tuikual 'A' Muala CT turning point-ah a chhuak ang.