Minister-in Durtlang Football Stadium a hawng

Durtlang Football Stadium thar chu March 17, Thawhlehni tlai khan UDPA minister K Sapdanga'n a hawng a; Sports & Youth Services minister Lalnghinglova, bialtu MLA Vanlalhlana leh MLA Jeje Lalpekhlua ten an ṭawiawm. Khelmual hi Aizawl Smart City Ltd sum vbc 22.3 sênga siam a ni.

K Sapdanga chuan, stadium hawn tâk chu sorkar hmasate sûlhnu chhuia an chhunzawm a nih thu sawiin, "Mizorama football khelmual ṭha ber hawn a ni thei ta hi a lawmawm. A panna kawng tur ngaihtuah mek a ni. Tun aṭanga kum 5-ah chuan Mizo tlangvalte hian Delhi, Chennai, Mumbai-ah te leh national level inkhelhnaahte an pet goal fo tur a ni, chu chu kan beisei let dawn che u," a ti a, statdium hmang ṭangkai turin ṭhalaite a chah.

UDPA Minister chuan, Bawngkawn leh Durtlang inkarah kawng ṭha leh changkang tak, complete street design duan vek a nih tawh thu sawiin, "Sum pawhin min hmuak rân tawh a ni," a ti.

Sports Minister pawhin thu sawiin, "Durtlang Football Stadium thar hi Mizorama football stadium ṭha ber a ni. National level mai ni lo, international level hial pawh la khelh ni se tih chu kan hmathlir a ni," a ti a; Mizoramin football khelhna atan liau liaua stadium serh hran, dedicated football stadium a awm ta chu Mizoram tan méllung pawimawh a nih thu a sawi.

Bialtu MLA Vanlalhlana, minister pawhin thu sawiin, Mizorama football stadium ṭha ber, international standard sak hlawhtlin a nih theihna tura thawktu zawng zawng chungah a lawm thu a sawi a, "International standard stadium panna kawng a la international standard ve rih lo hi siam thuai a ni ang," a ti.

Stadium hi November 30, 2022 khan siam ṭan a ni a, March 9, 2026 khan zawh a ni. Khelmual zau zawng a dung metre 110 leh a vâng metre 68m niin, FIFA pawmpui artificial grass phah a ni a, mi 1,257 leng ṭhutna a awm. Stadium pawnah lirthei ke li nei 50 leh ke hnih nei 90 dah theih a ni.

Durtlang Football Stadium hi Field Management Committee-in a enkawl ziu dawn a, Committee hi Durtlang Local Council kaihhruaina hnuaiah khawtlang hruaitu pawl hrang hrangte telna a ni.