Kawlphetha enkawlah Mizoram a che ṭha

Mizoram Electricity Regulatory Commission (MZERC) chuan nimin khan Aijal Club-ah Mizoram State Advisory Committee meeting vawi 28-na an buatsaih a; Power Foundation of India-in kum 2025 chhunga state leh union territory te chêt ṭhat dan (performance) a tehnaah Mizoramin point 87 hmuin, India ram pumah 10-na a nih thu tarlan a ni.

Mizoram State Advisory Committee hi MZERC chairperson Benjamin L Tlumtea’n a kaihruai a; Chairman chuan, Power Foundation of India-in kum 2025-a India rama state leh UT-te chêt ṭhat dan a tehnaah Mizoram chu India ram pumah 10-na a nih thu sawiin, "Grade A hmu phak state 11 zinga Mizoram a tel thei hi a lawmawm tak zet a ni," a ti.

Ṭhutkhawmah hian Mizorama power supply ṭha zawk neih dan tur te, Power & Electricity department-in mipui hnena kawlphetha ṭha taka a pek theih dan tur te, kawlphetha hmangtute hmakhua ngai taka power supply chungchanga lungawi lohna rang zawka chin felsak an nih theih dan tur sawiho a ni.

AMC huam chhung leh pawn lama felfai zawka street light enkawl dan tur te, smart metering hna thawh mek chungchang te, kum 2026-27 atana PE department-in power supply enkawlna atana sum a mamawh te, sorkar subsidy leh kawlphetha hman man (tariff) hmanga hmuh lêt leh dan turte sawiho a ni bawk.

Vawiin hian PE department-in power tariff hman an dilna chungchanga vantlang ràwnna (public hearing) neih a ni dawn a; MZERC-in mipui aṭanga rawtna leh sawiselna a dawnte leh PE department chhànnate ngaihthlak a ni ang.

State Advisory Committee hi Electricity Act, 2003 Section 87-in a sawi anga State Electricity Regulatory Commission thurawn petu tura din a ni a; commerce, industry, transport, agriculture, labour, consumer, non-governmental organi-zation leh electric lam kaihhnawiha acade-mic & research body hrang hrang aṭanga mithiamte member atan ruat ṭhin a ni.