Adviser to CM hoin Bána Kaih zirho

Champhai District Monitoring Committee (DMC) for Bana Kaih Scheme chuan March 18, Nilaini khan Champhai Circuit House-ah Bána Kaih Scheme chungchang zirhona an buatsaih a; adviser to chief minister (Handholding) Dr KC Lalmalsawmzauva'n a hmanpui.

Zirhonaah hian MSPCC member Laldikkimi leh Zohmingthanga ten Bána Kaih leh KCC chungchang an zirtir a, zawhna leh chhanna hun hman a ni. Member secretary Dr Peter Malsawmtluanga'n Bána Kaih hnuaia hmalak tawhnate leh lead bank district manager Lawmkima'n bank lam kaihhnawih leh loan pek chhuah tawh dan an sawi bawk.

Dr KC Lalmalsawmzauva chuan, sorkar hnain mi zawng zawng a daih loh avangin kutkawih eizawnna ngaih pawimawh a hun tawh thu sawiin, "Hmasawnna rahbi rap tura puih tlak ni turin mahni inṭanpui a, kan rilru kan siam thar a ṭul a, quantity aiin quality a pawimawh," a ti a; Bana Kaih hnuaia project-te chu bank kalphung zûlzuia tih a nih avangin monitoring leh document ṭha neih a pawimawh thu a sawi.

Adviser to CM hian Mualkawi Ginger Secondary Collection Centre, Khuangleng Ginger Secondary Collection Centre leh Ginger Processing Unit te a tlawh nghal a, a hnathawh dan leh hmalaknate a hmunah a enfiah a ni.