KHAWTHLIR

Phalna nei loa Oil zawrh khap

Aizawl district magistrate Lalhriatpuia chuan thupek chhuahin, Aizawl district-ah phalna nei loa petrol leh diesel zawrh/hralh khap a nih thu a puang a; thupek zâwm lote chu an petrol/diesel man a nih dawn bakah, BNS 2023 Section 223 hmangin a zuartute hrem an nih dawn thu a tarlang.

Software tlangzarh

Synod Bookroom software thar, barcode scan theiha siam chu nimin khan Synod executive secretary Rev.Dr K Lallawmzuala'n Pathian hnenah hlanin a hawng. Software thar hi April 2026 aṭangin hman a ni dawn a, nimin khan software hman dan inzirtirna hun hman nghal a ni.

DDMA aiawhte'n Serchhip an tlawh

National Disaster Management Authority (NDMA) Productive Sector Team chuan March 18, Nilaini khan Serchhip Zawlpui tlawhin, Post Disaster Needs Assessment an ti a; ruah leh leimin vanga thlai, leilet leh dil chhiate an endik bakah, Serchhip district-a sorkar hotute an kâwm. NDMA Productive Sector Team hi consultant (productive) pahnih - CT Mohan leh L Thungbeni Murry an ni.

MADS-in lawmpui

Mizoram Art Development Society chuan thuchhuah siamin, March 18, 2026-a International Women Day hmannaa Mizo hmeichhe chhuanawm mi 40 hnena Women's Award hlan zingah an member Lalhming Mawii, Chaltlang a tel chu an lawmpui thu an tarlang. Lalhming Mawii hian lemziah lamah a hlawhtlinna avangin kumin Chapchar Kûtah CM Chawimawina Nopui a dawn thu an tarlang bawk.

CM Special Package sem

Hnahthial district bawrshap K Vanlalruati chuan nimin khan DC meeting hall-ah Chief Minister Special Package Phase-II hnuaia progress partner atana thlan mi pali hnenah ṭanpuina Rs 50,000 ṭheuh a hlan. Bawrhsap chuan, hmasawn tumna tak tak nei tur leh ṭanpuina an dawnte a hmanna tur dik taka hmang turin progress partner thlan tharte a chah.