Lungleiah Bána Kaih scheme zirho: Phase II-ah DC-in district mi tam zawk thlan ni se a duh
Lunglei District Monitoring Committee huaihawtin nimin khan DC conference hall-ah Bána Kaih (Handholding) scheme hnuaia hmalakna thlirhona leh hmalak zel dan tur zirhona buatsaih a ni. Zirhona kaihruaitu Lunglei bawrhsap Navneet Mann chuan, Bana Kaih Phase II-ah Lunglei district aṭangin progress partner tam zawk thlan ni se a duh thu a sawi.
Lunglei Bawrhsap chuan, Bana Kaih Phase I chu Lunglei district-a department, bank leh mipuite'n an dawnsawn ṭhat thu leh progress partner mi 300 ziah luh an nih thu a sawi a, "A rem rem thawk leh lo neia ei zawng mi eng emaw zatin he scheme avang hian eizawnna ngêlnghet leh ṭha zawk an neih phah tawh. Phase II-ah hian Lunglei district aṭangin progress partner tam zawk thlan chhuah ni se ka duh," a ti a; progress partner atana thlante chu ṭha taka vil zui a, hmalakpui zel turin a changtu department-te a chah.
Zirhona hi Mizoram State Policy Coordination Committee (MSPCC) aṭangin Mizoram Bána Kaih (Handholding) chief executive officer (CEO) Lalfakzuala, MSPCC member Lalchhuanawma Hrahsel leh official dangte'n an hmanpui a; implementing department hrang hrang leh bank aiawhte an tel.
Tarlan danin, Bana Kaih Phase I-ah Lunglei district-ah department 10 kaltlangin progress partner 42 hnenah loan cheng nuai 234.4 pek a ni a; CM's Special Package hnuaiah progress partner 368 hnenah cheng nuai 288.27 pek a ni bawk.