Ran insurance inzirtirna buatsaih

Siaha district-a ran vulhtute tan nimin khan Mara Autonomous District Council (MADC) Forest Hall-ah livestock insurance hawn a ni a; mimal leh society hruaitu kal khawmte pualin ran (livestock) insurance chungchang inzirtirna buatsaih nghal a ni.

District Vety officer Dr H Lalzarliana chuan, mi kut tawrh vang te, khuarel chhiatna leh hri vangtein ran an thi fo tih sawiin, "Chhiatna tawh palh a nih pawha kutbénga kan awm loh nan leh zangnadawmna kan hmuh theih nan sorkarin ruahmanna ṭha tak a siam a, ran vulhtu a tam thei ang berin chhawr se kan duh," a ti a; kum 2025 khan Siaha district-ah ASF vangin cheng nuai 800 chuang hû vawk thi/suat a awm thu a sawi.

National Insurance Company aiawhin HZ Lalremtluanga'n livestock insurance inkaihhruaina leh kalpui dan tur a sawifiah a, "Insurance kan tih reng rengin 100% hmuh lêt theih a ni lo a, hri lênna hmuna sorkarin a puan meka chengte tan insurance a tih theih loh bawk. Chutihrualin, Mizo mipui hmakhua ngaia Mizoram sorkar leh National Insurance Company-in thawhhona thuthlung a ziak hi thil lawmawm tak a ni," a ti.

Sorkar thuchhuah tarlan danin, Mizoram sorkar leh NIC thawhhona hnuaia ran insurance tite tan ran a thihin Aizawl, Mamit, Kolasib, Serchhip, Hnahthial, Saitual, Khawzawl leh Champhai district mite tan Lalhriatpuii (9147400133) leh Lalmalsawmi (9147400511) hnenah hriattir tur a ni a; Lunglei, Lawngtlai leh Siaha district mite tan Israel K Lalawmpuia (8794723988) hnenah hriattir tur a ni.

Ran a thih aṭanga ni thum (working day) chhungin insurance office hriattir a nih loh chuan insurance pek theih a ni lo a, insurance a nun ni aṭanga ni 21 chhunga natna vanga ran a thih chuan insurance pek theih a ni lo bawk.