Thisen pek chungchangah inráwn khawm

Association for Voluntary Blood Donation (AVBD) chuan nimin khan Zarkawt Community Hall-ah a thlawna thisen pek chungchanga inràwnkhawmna, Consultation on Voluntary Blood Donation an buatsaih a; pawlte'n awmze nei zawka a thlawna thisen pek an huaihawt dan tur sawiho a ni.

Inràwnkhawmnaah hian Central YMA, Central KṬP, Aizawl ṬKP Coordination, PYD (North East leh Mizoram), Territorial Salvation Army Youth leh Adventist Youth Federation aiawh te, State NSS Officer leh college hrang hranga NSS programme officer-te an tel a; AVBD vice president K Zothanpara'n kaihruaiin, AVBD general secretary Lalrinkima'n inràwnkhawm buatsaih chhan a sawifiah.

AVBD hruaitute'n Mizoramah a thlàwna thisen pek a ṭhat lehzual theih nan leh thisen pekte ṭangkai lehzuala a mamawhte'n an hman theihna tura rawtna an neihte an sawi a; pawl hrang hrangte'n blood donation camp ṭum khatah thisen pe ṭeuh lo a, zing zawka thisen an pek theih dan tur te, blood bank leh thisen petu pawlin harsatna an neihte sawiho a ni. Pawl aiawhte'n an pawlin thisen an pek dante leh rawtna an neihte an sawi a, hriat chian duh an neihte an zawt bawk.

Zawhnate chu AVBD hruaitute leh Civil Hospital, Aizawl Blood Bank-a consultant Dr C Zohmingliani, Synod Hospital Blood Bank-a hotu Dr B Lalnunthari leh Zoram Medical College and Hospital Blood Bank-a blood bank officer Dr ST Lalhriatpuii ten an chhang a ni.