Sports Minister leh Khelo India ED inkawm

Nimin khan Sports minister Lalnghinglova Hmar chuan a pisaah Khelo India executive director Lt Col Kabilsan Sai Ashok a kawm a, Khelo India hnuaia hmalak theihna hrang hrang an sawi dun.

Lalnghinglova Hmar chuan Mizote chu infiamna ngaina tak an nih thu sawiin, "Mah se, India ram state dang nena khaikhin pawhin medal kan la tam ṭhin lo. Hemi siamṭha tur hian training dik leh a hun taka mumal taka training kan neih a ngai a ni," a ti a, Mizorama infiamna hrang hrangten hmasawnna tura an mamawhte a sawi.

Sports Minister-in mamawh a tarlan zingah Khelo India State Centre of Excellence (KISCE) a High Performance Manager lak theihna tura ngaihhnathiamna awm a ṭul thu leh Mizoramah mipa naupang tan hockey academy changtlung tak din a ngaih thute a tel a ni.

Lt Col Ashok chuan Khelo India Mission thar kalpui dan tur a sawifiah bakah, Mizoram Sports Minister-in harsatna leh mamawh a sawi chungchanga hmalak theih dante tarlangin, "Coaching ṭha neih a pawimawh," a ti a, Mizoramin infiamna zirna a kalpui hrang hrangte chu Khelo India hnuaia changtlung zawk a nih theihna tura ziahluh awlsam dan a sawifiah.

Ṭhutkhawmah hian MSSC secretary Henry C Lalrawnkima chuan Mizoram sorkarin Bana Kaih hnuaia ‘Empowering Mizoram Sports’ a kalpui dan chu a lem nen a sawifiah a, Olympic Games 2036 thlira Mizoramin hma a lak dante thlirho a ni.