Minister-in Thangram Cultural Meet a hmanpui; 'Kan awmna ṭheuhah khua leh tui ṭha nih tur' - Art & Culture Minister
Art & Culture minister C Lalsawivunga chuan March 19, Ningani zan khan Ronpur, Assam-ah 'Thangram Cultural Meet, 2026' hmanpuiin, hmun hrang hranga Zo hnahthlakte chu an awmna hmun ṭheuhah khua leh tui ṭha ni turin a chah a; cultural meet chuan Thangram chhehvela cheng Zo fate tan inlungrualna ṭha lehzual thlen se a duh thu a sawi.
C Lalsawivunga chuan, Zo hnahthlak peng hrang hrangte chu an chenna ṭheuh leilungin daidang rih mah se, Zo fate inunauna erawh engmahin a ṭhen hran dawn loh thu a sawi a, "Kan awmna hmun ṭheuhah khua leh tui ṭha kan ni tur a ni a, khua leh tui ṭha in a tih tur hrang hrangte midangte tana hnawk lo tura khawsak kan tum tur a ni," a ti.
Cultural meet zalen leh hlim tak, boruak muanawm tak hnuaia hman a ni chu Assam sorkar chungah C Lalsawivunga chuan a lawmthu a sawi a, "He meet hian Thangram chhehvela cheng Zo fate tan inlungrualna ṭha lehzual thlen se ka duh," a ti a, Mizo culture vawng nung zel chunga Zo nun ze mawi tlawmngaihna, aia upate zahna, hawihhawmnate vawng nung zel turin a sawm.
Art & Culture Minister chuan Zo fate tana Pathianin a hun ruat a thlen tir hunah chuan engmah daidangtu nei loin an la khawsa ho dawn tih sawiin, chumi thleng thei tur chuan an awmna hmun ṭheuhah Mizo nihna inhre reng chunga mawi taka khawsa turin kalkhawmte a chah a ni.
Adviser to CM Lalmuanpuia Punte, MLA pawhin thusawiin, Thangram leh a chhhevela chengte chu Mizoram sorkar chuan ngai pawimawh hle tih a sawi a, "British hun lai aṭangin Zo fate chu hmun hrang hrangah ṭhendarh kan ni a, insuihkhawm lehna tura ram hruaitu, tlawmngai pawl hrang hrang kaltlanga hmalaknaah hmasawnna hmuh a ni zelte hi Pathian hian min hriatpui tlat a ni tih a tichiang," a ti a, a hunah chuan ram khatah inlungrual takin an la khawsa ho dawn tih a sawi.
Thangram Cultural Meet hi Thangram Indigenous People Movement leh Mizo Zirlai Pawlte ṭangkawp buatsaih niin, kum 2021 khan a vawi khat nan neih ṭan a ni.